Аксубай районында төзелеп килүче бинаның гөмбәзен һәм тәреләрен изгеләндерделәр

Изгеләндерү йоласын Чистай һәм Түбән Кама епископы Пахомий башкарды.

Бу авылда чиркәү өч ел элек төзелә башлаган. Авыл халкы Аксубай районы чиркәве башлыгы протоиерей Александр Качаев җитәкчелегендә алты ел дәвамында авыл мәхәлләсен торгызуга акча җыйган. Авыл клубында алар гыйбадәт бүлмәсе әзерләгәннәр һәм гыйбадәтләрне шунда үткәрәләр. Кышка кадәр авыл кешеләре бинаның диварларын күтәрергә һәм түбәсен ябарга өлгергәннәр. Тәрәзә уемнары әлегә пленка белән ябылган, аларга заказлар бирелгән.

Төзелеш эшләрен алга таба дәвам итү өчен акча җыю дәвам итә. Эш дәвам итсен, гыйбадәт йортын ачу көне тизрәк якынлашсын өчен дин тотучылар, битараф булмаган кешеләр акчалата ярдәм итәләр.

Владыка Пахомий төзелеп килүче Изге Николай чиркәвенең гөмбәзен һәм тәреләрен изгеләндерү гыйбадәтен башкарды. Изгеләндерү гыйбадәте тәмамлангач ул дин тотучыларга мөрәҗәгать итте.

– Бүген бездә зур тарихи вакыйга – булачак гыйбадәт йортының гөмбәзләрен һәм тәреләрен изгеләндерү йоласы, – дип билгеләп үтте ул. – Бу вакыйга авыл тарихына зур алтын хәрефләр белән язылачак. Чиркәү – ул гыйбадәт кылу урыны, без бирегә шатланып җыелыштык. Чиркәү төзелеп беткәч тагын да зуррак гыйбадәт кылачакбыз – гыйбадәт йортын тантаналы төстә изгеләндерәчәкбез. Мин авылның барлык кешесен котлыйм, сезнең өчен шатланам һәм сезнең өчен гыйбадәт кылам. Бу вакыйга дин тотучыларны ныгыту вакыйгасы булсын иде, аның янәшәсеннән узучы һәр кеше Изге Николай гыйбадәт йортын күреп сөенсен иде.

Епископ хезмәтләре, тырышлыклары, ярдәмнәре өчен барысын да рәхмәт әйтте.

Төзүчеләр шул арада үз эшләренә керештеләр, авыл кешеләре исә аларга ярдәм иттеләр.

Кран белән куполларны, тәреләрне югары күтәрделәр һәм аларны чиркәү түбәсенә урнаштырдылар. Бинага җан кереп киткәндәй булды – алар кояш нурлары астында алтынсу булып балкыды.