Аксубай районы әниләре махсус хәрби операциядә катнашучы якташлары өчен 50 яшеренү сеткасы бәйләделәр һәм 60 яшеренү костюмы тектеләр

Монда волонтерлар җыелды, алар өч атна дәвамында мобилизацияләнүчеләргә маскировкалау сеткалары үрделәр һәм яшеренү халатлары тектеләр.

Әлеге игекле акциянең инициаторы – Аксубай «Буратино» балалар бакчасы мөдире Гөлшат Гыйльметдинова. Ул йөзләгән аксубайлыларны берләштереп, Телеграммда төркем туплады.

– Махсус операция башлануга ук, мин сугышчыларыбызга нәрсә белән ярдәм итә алуыбыз хакында уйландым. Күрше Чистайда яшеренү сеткалары үрүләрен белгәч, безнең районда да бу производствоны оештыру теләге туды, күрше район волонтерлары белән элемтәгә кердем һәм тәҗрибә өйрәнергә киттем. Беренче булып мин үз хезмәткәрләремә – балалар бакчасы коллективына мөрәҗәгать иттем, алар минем беренче ярдәмчеләрем булдылар, – дип искә алды Гөлшат Гыйльметдинова. – Әмма бу эшне шулкадәр күп кеше хуплар дип уйламаган да идек, алар үзләре генә түгел, ә дусларын, күршеләрен, хезмәттәшләрен дә алып килделәр.

Яшьләр үзәге кирәкле материалны җыю һәм җәлеп итү урыны булды. Әниләр, әбиләр, эшче яшьләр, мәктәп укучылары ял көннәрендә дә, эш көннәрендә дә, хәтта эштән соң да көн саен килделәр, кирәкле материаллар, эштә кирәк булган бөтен нәрсәне алып килделәр һәм аларны балык тоту челтәренә тырышып бәйләделәр. Хатын-кызлар бирегә өйдән тегү машиналары алып килделәр: берәүләр кистеләр, икенчеләре маскировка костюмнары тектеләр. Өч атна эчендә районда яшәүче йөзләгән кеше яшьләр үзәгендә булды. Авыллардан да төркем-төркем хатын-кыз килде.

Волонтерлар һәм җәмәгатьчеләр бу көннәрдә аларның дөньяга карашлары тулысынча үзгәрүен таныдылар, хәтта гадәти төшке аш вакытында да, монда эшче куллар кирәклеген белеп, бирегә ашыктылар. Һәр көнне шулай булды! Волонтерлар арасында Аксубай бистәсе Советы депутаты, пенсионер, активист һәм җәмәгатьче Галина Киселева һәм аның ике кызы – Елена һәм Наталья бар.

– Кадерле сакчыларыбыз, без бөтен күңелебез һәм йөрәгебез белән, кулларыбызның җылысын салып, сезнең өчен 60 маскировка халаты тектек, 40 гын сезгә җибәрдек инде, калганнары җибәрергә әзер, – ди Галина Семеновна, күз яшьләрен көчкә тыеп. – Безнең кулларыбыз җылысы сезне җылытсын һәм сакласын өчен, игелекле әниләребез, әбиләребез сезнең өчен тагын тегәчәкләр. Без сезнең өчен көн саен дога кылабыз, җиңү белән кайтыгыз!

Ниһаять, алдан билгеләнгән планнар үтәлде – костюмнардан кала бүгенге көнгә 50 яшеренү сеткасы үрелде. Бу кечкенә эш нәтиҗәләрен волонтерлар Әниләр көне алдыннан, бәйрәм өстәле артында билгеләп үттеләр.

– Кадерле әниләребез, яраткан балаларыгызны саклар өчен, аларга ярдәм итәр өчен кулдан килгәннең барысын да эшләргә сезнең көчегез бар. Алмашка бүләк сорамагыз, сезнең өчен әни булу мөһим! – дип сәламләде барлык әниләрне Гөлшат Гыйльметдинова.

– Игелекле эштә катнашучыларның барысын да санап чыгу һәм атау мөмкин түгел. Кемдер ятьмәләр сатып алу өчен акча бирде, икенчеләре тектеләр, үрделәр, кемдер киселгән костюмнарны үзе белән алып китеп, төнлә өйдә текте. Кемдер волонтерларга чәй янына бәлешләр алып килде. Кемнәрнедер атап, башкаларны онытырмын дип куркам. Тагын бер тапкыр рәхмәт, без үзебезнең СВОдагы ир-егетләребезне ташламыйбыз! Ватанны саклауга чакырылган егетләргә алга таба да ярдәм итәчәкбез, алар өчен эчке киемнәр тегә башлаячакбыз, маскировка халатлары тегүне дәвам итәчәкбез. Егетләр җиңү белән кайтканчы эшләячәкбез!!!