Аксубай – Нурлат: шахмат традицияләре яңадан торгызылды

Мондый очрашулар элекке елларда да традицион булган. Алар 1973 елдан бирле уздырылган һәм ике районның да интеллектуаль спорт төрен яратучылары арасында бик популяр булган: безнең спортчылар күрше районга барганнар, шулай ук Нурлат вәкилләрен үзләрендә дә каршы алганнар. Мондый ярышлар 2012 елга кадәр уздырыла. Аннары, төрле сәбәпләр аркасында, нурлатлыларның һәм аксубайлыларның шахмат такталары артында очрашулары туктала.

Быел бу традицияне яңартырга карар иткәннәр. Февраль аенда безнең район командасы үз мәйданчыгында оппонентлар белән очрашты. Катнашучылар арасында уеннар тигез булды, матч тигез исәп белән тәмамланды. Традицияләрне дәвам итеп, шушы көннәрдә Нурлат шахматчылары Аксубайга җавап сәфәре белән килде.

– Нурлатлылар белән матчлар схевенинген системасы буенча узды – бу ике команда арасында шахмат матчын оештыру ысулы, – дип аңлатты ярышларның баш хөкемдары Геннадий Горбунов. – Бер команданың һәр уенчысы икенче команданың һәр уенчысы белән уйный. Бу иптәшләрчә очрашуда Нурлат районы командасы көчлерәк булып чыкты һәм җиңүче булды.

Безнең район катнашучылары арасында Фаил Гафиятуллин иң күп очко җыйды (Нурлатта барлык матчларны да җиңелүләрсез уздырды).

Ярышлар кысасына шашка турниры да кертелгән иде. Монда да мәйданчык хуҗалары кунакларга җиңү шансы бирмәделәр. Владимир Королев, Геннадий Горбатов, Алмаз Камилов, Андрей Егоров һәм Флен Зәйнуллин үз партияләрен бик яхшы уйнадылар. Нәтиҗәдә, командага лидерлыкны тәэмин иттеләр.

Аксубай мәйданчыгында ярышларны оештыруда “Беренчеләр хәрәкәте” иҗтимагый оешмасының җирле бүлекчәсе җитәкчесе Светлана Башатова зур ярдәм күрсәтте. Ә хәрәкәт катнашучылары Фаил Гафиятуллин, Рамзан Вәлиев район данын лаеклы якладылар.