«Аксубай егетләре» Яңа Чишмә гармунчылар фестивалендә бәйге җиңүчесе булды

Яңа Чишмә муниципаль районының Чуаш Чабаксары авылында «Выля, хут купăс!» («Уйнагыз, гармуннар!») XI Республика чуаш халык иҗаты фестиваль-бәйгесе узды. Музыкаль бәйрәмгә чуаш җырларын иң яхшы башкаручылар, халык уен кораллары оркестрлары, гармунчылар оркестрлары, катнаш ансамбльләр, такмаклар башкаручылар җыелды. Иҗади бәйгедә районда һәм аннан читтә танылган Никита Семенов һәм Ильяс Исмәгыйлев составындагы «Аксубай егетләре» балалар ансамбленең дуэты да катнашты. Безнең яшь талантларыбыз бик яхшы чыгыш ясадылар һәм беренче дәрәҗә лауреат исеменә һәм истәлекле бүләкләргә лаек булдылар.

– Ильяс һәм Никита чын бәйрәмнән күтәренке күңел белән кайттылар, кунакларны Чуаш сырасы белән дә, тәмле чәй белән дә, тәмле төшке аш белән дә сыйладылар, – дип уртаклашты ансамбль җитәкчесе Наилә Крайнова. – Фестиваль дәвамында безнең өчен районның Чуаш милли-мәдәни үзәге рәисе Роза Чентаева җан атты. Укучыларның программада катнашуында да ул инициатор булды, безне фестивальдә озатып йөрде. Аңа чын күңелдән рәхмәт сүзләре җиткерәсе килә.