Аксубай архивы ветеранының эше – үткән белән бүгенге арасында күпер кебек

Ул бөтен гомерен туган төбәгенә хезмәт итүгә багышлаган – башта административ вазифаларда, аннары, буыннар хәтерен саклап, архив эшендә.

Казан авыл хуҗалыгы институтын “Авыл хуҗалыгы җитештерүендә икътисадчы-оештыручы” белгечлеге буенча тәмамлаганнан соң, Надежда Васильевна район авыл хуҗалыгы һәм азык-төлек идарәсенең план бүлегендә хезмәт эшчәнлеген башлый. Һөнәри осталыгы һәм җаваплылыгы аңа халык депутатларының Аксубай бистәсе Советы рәисе урынбасары һәм район Башкарма комитеты секретаре вазифаларын биләргә мөмкинлек бирә.

2000 елдан Надежда Васильевна район Башкарма комитетының архив бүлеген җитәкли. Ун елдан артык гомерен ул архив эшенә багышлый. Үзенең һөнәри бурычларын зур җаваплылык белән башкара. Аның эшчәнлегенә бәя бирү турында Татарстан Республикасы Дәүләт Советы һәм Министрлар Кабинеты Рәисенең Рәхмәт хатлары, “Казанның 1000 еллыгы истәлегенә” медале белән бүләкләнүе сөйли.

Лаеклы ялда Надежда Васильевна тарих һәм архив эше белән тагын да тирәнрәк кызыксына башлый. Россия һәм ТР Дәүләт архивларының һәм җирле архив бүлегенең бай фондларына чумып, ул Аксубай районы тарихына һәм аның халкына багышланган күпсанлы китаплар һәм белешмәлекләр бастырып чыгарды.

Аның хезмәтләре арасында – районның православие гыйбадәтханәләре тарихы турында сөйләгән “Чиркәүгә мәңгелек юл”; Бөек Ватан сугышы елларында эвакуацияләнгән Мәскәү профессоры А.А. Занковский гаиләсе турындагы “Онытылмаган очрашулар”; якташларның биографияләре һәм батырлыклары турында архив материаллары тупланган “Аксубай районында туып-үскән Советлар Союзы геройлары һәм Социалистик хезмәт геройлары” китаплары бар.

Надежда Васильевна шулай ук районның картадан юкка чыккан торак пунктларының генеалогиясен һәм тарихын тикшерә, колхозлар һәм совхозлар буенча белешмәлекләр төзи, ә аның туган якны өйрәнүче Владимир Чураков белән уртак басмалары Аксубай районы тормышының аз билгеле битләрен ача. Иҗади хезмәттәшлекнең нәтиҗәсе дистәләгән тарихи басма булды.

Аның китаплары Татарстанның Милли китапханәсенә, район китапханәсенә һәм Аксубай туган якны өйрәнү музеена тапшырылган. Әлеге басмалар тикшеренүчеләр һәм район халкы өчен кыйммәтле белем чыганагы.

Бүген Надежда Васильевна, үткәннең яңа битләрен ачып, туган як тарихын өйрәнү буенча актив эшен дәвам итә. Аның тырыш хезмәте үткән белән бүгенгене бәйләп торучы күпер кебек. Аның шушы эшләре нәтиҗәсендә район кешеләре һәм андагы вакыйгалар турында истәлек сакланачак.

Фото Надежда Петрованың шәхси архивыннан.