Африка дуңгыз чумасын булдырмаска

АЧСның терлекчелек өчен нинди куркыныч тудыруы турында район ветеринария берләшмәсе җитәкчесе Рәис Хөснуллин сөйли.

– АЧС вирусы бик чыдамлы, авыру вирус белән зарарланган азык, түшәмә, тирес, үләксәләр һәм терлек чалу продуктлары, шулай ук талпаннар аша тарала. АЧС билгеләре: тән температурасының 41,5 – 42 градуска кадәр күтәрелүе, аппетит югалу, сусау, хәлсезлек, эч китү (кайвакыт кан белән). Дуңгызларның борыныннан кан китә, корсак, колак тиресендә һәм ботның эчке өслегендә басканда агармый торган куе кызыл (шәмәхә) таплар барлыкка килә.

Авыруны дәвалау һәм аңа каршы профилактика чаралары юк – авырган хайваннар 100 процент очракта үлә.

Профилактика чаралары түбәндәгечә: эпизоотик учакта барлык дуңгызлар да кансыз ысул белән юк ителә һәм яндырыла. Беренче куркыныч зонада (эпизоотик учак тирәли 5 километр радиуста) – ит комбинатындагы барлык дуңгызларны чалу каралган. Икенче куркыныч зонада (беренче зона тирәли 100 км радиуста) базарларда дуңгызчылык продукциясе белән сәүдә итү, ярминкәләр һәм күргәзмәләр үткәрү тыела.

Дуңгыз асрарга карантин алынганнан соң бер ел узгач кына рөхсәт ителә. Хайваннарны сатып алу, сату, чалуга тапшыру бары тик ветеринария хезмәте белән килешкәннән соң гына башкарылырга тиеш.

Әгәр сез югарыда күрсәтелгән билгеләре булган авыру хайванны күрсәгез, бу хакта шунда ук ветеринарларга яисә 8 (843-44) 2-72-51 телефоны буенча район ветеринария берләшмәсенә хәбәр итәргә кирәк.