2,6 миллион сумлык сатканнар

Алар чираттагы тапкыр Казанның Агросәнәгать паркында узган авыл хуҗалыгы ярминкәсендә катнаштылар. Ярминкәдә 23 сәүдә ноктасы гөрләп эшләде. Фермерлар, шәхси ярдәмче хуҗалыклар, эшмәкәрләр сатуга азык-төлек товарларының киң ассортиментын алып килделәр. Шул исәптән – яшелчәләр, җиләк-җимеш, бал, ит һәм сөт әйберләре. Сәүдә рәтләре иртәдән үк халык белән тулла башлады, товарлар теләп сатып алынды. Авыл хуҗалыгы җитештерүчеләре өчен ярминкәдә катнашу – җитештерелгән продукцияне сату, ә башкала халкына бер урында сыйфатлы азык-төлекне очсыз бәядән сатып алу мөмкинлеге бирә. Аксубайлылар 2, 6 миллион сумлык товар сатты.

Октябрь иртәсе алай ук салкын тоелмады – музыка, район мәдәният бүлеге вәкилләренең яңгыравыклы чыгышлары кәефләрне күтәрде, җаннарны җылытты. «Аксу Агро» авыл хуҗалыгы предприятиесе Өлкәннәр айлыгы кысаларында сатып алучылар өчен чәй табыны оештырды.

Фото: район авыл хуҗалыгы һәм азык-төлек идарәсе архивыннан.