Язгы чакырылыш башланды

2018 елгы язгы чакырылыш чоры план буенча үткән елгы чакырылыштан берни белән дә аерылмый. Ул 106 көн дәвам итәчәк. Көзге чакырылыш белән чагыштырганда, әлеге кампаниядә Татарстаннан армия хезмәтенә үткән елга караганда 300гә кимрәк кеше чакырылачак. Элеккечә, 2018 елгы чакырылыш кампаниясе барышында югары яки урта техник белемнәре булган 27 яшькәчә егетләргә басым ясалачак. Армиягә чакырылачак егетләрнең 80 процентка якыны шундый белемгә ия булыр дип көтелә. Язгы чакырылышта РФ Кораллы Көчләре сафларын Аксубай районыннан 50дән артык егет тулыландырачак.