Аксубай укучылары куркынычсыз велосипед бәйгесендә көч сынаштылар

Ул Аксубайның 2 нче мәктәбе базасында яшь юл хәрәкәте инспекторлары арасында узды. Бәйгедә районның 14 ЮИД отряды катнашты. Катнашучылар автошәһәрчектә велосипед йөртү, Юл хәрәкәте кагыйдәләрен белү, куркынычсызлык һәм тормыш эшчәнлеге нигезләре, велосипед төзелеше һәм «Бергәләп – Юл хәрәкәте иминлеге өчен!» иҗади бәйгесендә көч сынаштылар. Бәйгедә гомуми зачетта 2 нче мәктәпнең яшь юл хәрәкәте командасы җиңде, икенче урында – Кәкре Күл мәктәбе, өченчедә – Иске Ибрай мәктәбе отрядлары. Җиңүчеләргә кубоклар, грамоталар, бүләкләр тапшырылды. Башка катнашучылар да бүләксез калмады – аларга «Юл хәрәкәте иминлеге» ДБУ сувенирлары һәм яктылык кайтаручы брелоклар тапшырылды.

Фото: Аксубай районы ЮХИДИ бүлеге архивыннан