В.Ф. Тарасов исемендәге Иске Мокшино мәктәбендә район җитәкчесе белән очрашу булды

Алмаз Мингулов һәм район мәгариф бүлеге җитәкчесе Рәмзия Зәйдуллина агросыйныфта дәрестә булдылар.

«Тәрәзә төбендә бакча» темасына дәрес вакытында сигезенче сыйныф укучылары кунакларга, барлык агротехник таләпләрне үтәп, үзләренең авыл хуҗалыгы культуралары орлыкларын чәчү һәм чәчәкләр үстерү буенча осталыкларын һәм күнекмәләрен күрсәттеләр.

«Бүлмә шартларында үсемлекләрне үстерү буенча тәҗрибә нигезләрен салу» темасына дәресне беренче категорияле биология һәм химия укытучысы Рузилә Нигъмәтуллина үткәрде.

Агросыйныфның төп максаты, мәктәп завучы Наталия Козлова билгеләп үткәнчә, укучыларда авыл хуҗалыгы һөнәрләре белән кызыксыну уяту һәм балаларга хезмәт тәрбиясе бирү. Наталия Викторовна сүзләренә караганда, мәктәп Аксубай универсаль технологияләр техникумы, Казан дәүләт аграр университеты һәм «Волга-Селект» предприятиесе белән хезмәттәшлек итү турында килешү төзегән. Агросыйныф укучылары барлык республика фәнни-тикшеренү һәм гамәли конференцияләрдә, шулай ук «АгроНТРИ» Бөтенроссия бәйгесендә катнашалар һәм призлы урыннарны яулыйлар.

Укыту программасына мәктәп яны участогында лекция һәм практик дәресләр кертелгән (Иске Мокшино мәктәбендә күп еллар, ачылган моменттан алып диярлек мәктәп яны участогы эшли), районның авыл хуҗалыгы предприятиеләренә һәм тиешле юнәлештәге югары һәм һөнәри белем бирү оешмаларына сәяхәтләр оештырыла.

Дәрестән соң Алмаз Мингулов укучылар белән авыл хуҗалыгы һөнәрләре, авылда агрария белгеченең әһәмияте һәм роле турында әңгәмә үткәрде.

Мәктәп буенча экскурсиядән соң Алмаз Мингулов 11 сыйныф укучылары белән очрашты.

Чыгарылыш укучылары район җитәкчесе белән киләчәккә планнар белән уртаклаштылар.