Аксубайда тату сыйныф серләрен ачтылар

Бу чара мәгариф оешмаларында тәрбия эшчәнлегенә ярдәм итүче ата-аналар комитетларына – традицион гаилә рухи-әхлакый кыйммәтләре нигезендә балаларны тәрбияләү культурасын саклап калуга, ныгытуга һәм үстерүгә юнәлдерелгән.

Иң яхшы ата-аналар комитеты дип аталу хокукы өчен республиканың алты районы: Әлки, Алексеевск, Нурлат, Яңа Чишмә, Спас районнары һәм Аксубай 3нче мәктәбенең 10нчы сыйныф укучылары көч сынашты.

Иң актив һәм иҗади ата-аналарны һәм балаларны конкурс башланыр алдыннан район Башкарма комитеты җитәкчесе урынбасары Алексей Тимирясов сәламләде.

– «Тату сыйныф серләре» конкурсы коллектив эчендә дуслыкны ныгытуга, ата-аналар һәм укытучылар арасындагы мөнәсәбәтләрне яхшыртуга ярдәм итә, – дип билгеләп үтте ул. – Аның ярдәмендә мәктәп һәм ата-аналар комитеты арасында, үсеп килүче буынны бергәләп тәрбияләү белән актив шөгыльләнү өчен, конструктив диалог җайга салына. Бу кызыклы конкурста һәркемгә уңышлар телим!

Бу кичне беренче мәктәптә барысы да бер дулкында иде. Катнашучылар программаны Россия халыклары бердәмлеге елына багышланган күргәзмә белән ачып җибәрделәр. Биредә балаларның һәм өлкәннәрнең милли мәдәнияткә ничек җәлеп ителүен, үз халыкларының тарихы турында күп белүләрен, сыйныфташларының һәм ата-аналарының музыкаль, сәхнә, сәнгать иҗаты белән танышуларын, аларның үз куллары белән көнкүреш әйберләре һәм бизәнү әйберләре ясау, тәмле милли ризыклар әзерләү осталыгын күрергә мөмкин иде. Күргәзмәдә аерым тема итеп махсус хәрби операция сугышчыларына ничек ярдәм итүләрен күрсәттеләр. Өченче мәктәп командасы 3D-принтер тәкъдим итте, аның ярдәмендә антидрон пулялар ясыйлар. Эчтәлекле күргәзмәләр таң калдырырлык иде. Аларны булдыруга шулкадәр күп хезмәт, талант һәм фантазия салынган. Конкурс комиссиясе аларның һәркайсын лаеклы бәяләде.

Актлар залы җылы атмосфера белән тулды. Бәйге программасында бөтен кич дәвамында ата-аналар комитетлары бердәм команда төзү буенча иң яхшы тәҗрибәләре белән уртаклаштылар. Тату сыйныф серләре бергәләп эшләгәндә барысы да мөмкин икәнен ышандырырлык итеп күрсәтте.

Бәйгедә катнашучылар «Визит карточкасы» һәм «Иҗади проект» номинацияләрендә үзләренең осталыкларын күрсәттеләр. Һәм бу да тәэсирле булды. Командалар сәхнәдә бик оста чыгыш ясадылар, аларның кыска сәхнә номерлары тирән мәгънәле булды һәм сыйныфның никадәр дус булуын, ата-аналар комитетларының алар белән ничек тыгыз бәйләнештә булуын ачык күрсәтте.

Нәтиҗәләрне игълан иткәндә, зал алкышларга күмелде — Аксубай укучыларына уңыш елмайды: Аксубай 3 нче мәктәбенең 10 Б сыйныфы командасы беренче урынны алды!

– Без барыбыз да бик бәхетле – барысы да килеп чыкты, – дип тәэсирләре белән уртаклашты 10 «Б» сыйныф җитәкчесе Людмила Кандалина. – Без конкурсның зональ этабында бердәмлек, дуслык, сыйныф коллективы һәм ата-аналар ярдәмендә җиңдек. Әти- әниләр бик позитив, актив, ә кайберләре – минем элеккеге укучыларым. Ә балалар белән дүрт ел эшлим һәм алар – иң яхшылары.