Аксубай районының мәктәп яны лагерьлары эшләрен төгәлләде

Смена дәвамында уен-көлке, ыгы-зыгы хөкем сөрде, һәм безнең газетаны алучылар да күп кенә кызыклы чараларның шаһитлары булдылар. Һәр көн якты вакыйгаларга, спорт ярышларына һәм танып белү бәйгеләренә бай булды. Тәрбиячеләр һәм вожатыйлар, шулай ук лагерь җитәкчеләре – тәрбия буенча директорлар киңәшчеләре, балаларның ялы кызыклы гына түгел, файдалы да булсын өчен тырыштылар. Алар тәрбияләнүчеләргә үзләренең бөтен педагогик талантларын, рухи юмартлыкларын бирделәр, балаларның лагерьда булу көннәрен онытылмаслык итәр өчен, күп кенә мавыктыргыч дәресләр һәм экскурсияләр үткәрделәр.

Ял вакытында балалар һәм тәрбиячеләр зур тату гаилә булып берләштеләр. Ләкин иң мөһиме, балалар дуслыкны кадерләргә өйрәнделәр.

Ябылу тантанасы аларның барысы өчен дә күңелсез вакыйгага әйләнде. Смена «Син мине онытма!», «Дуслар белән аерылышабыз» дигән саубуллашу уеннары, спорт ярышлары һәм импровизацияләнгән концертлар белән төгәлләнде. Иң актив һәм креатив балаларны спорт чараларында, викториналарда һәм бәйгеләрдә ирешкән уңышлары өчен бүләкләделәр.

Балалар лагерьдан спортчан, үз-үзләренә нык ышаныч белән киттеләр, һәм аларның барысының да үзбәясе артты.

Лагерьның соңгы көне Дәүләт әләмен төшерү тантанасы белән тәмамланды.

Фото: Аксубайның 3 нче, Аксубайның 2 нче, Аксубайның 1 нче мәктәпләре, Иске Ильдеряк, Иске Тимошкино, Савгач, Сөнчәле урта мәктәпләре архивларыннан.