Садовая урамында яшәүчеләр дә асфальт юллы булды

Без иҗади командировкада булганда, газета укучыбыз – Садовая урамында яшәүче элеккеге мәктәп китапханәчесе Фәридә Фәезова безгә берничә тапкыр шалтыратты. Ә без кайтканда, ул безне редакциядә көтә иде инде.

Фәридә Валентиновна – безнең игелекле дустыбыз, эштә без мәктәп китапханәсе белән бик еш хезмәттәшлек иттек. Редакциягә дә ул болай гына түгел, ә шатлыгы белән уртаклашыр өчен килде.

–- Бәхеттән күзгә яшь килә, урамыбызда шулкадәр күп юл техникасы, шулкадәр күп эшче эшли, – дип башлады сүзен Фәрит Валентиновна. – Һәр кеше үз участогында үзенә тапшырылган эшне җиренә җиткереп үтәп, бердәм эшли. Моннан ун көн элек урам юлына асфальтның беренче катламы түшәлгәч, без чын күңелдән сөендек. Ә бүген эшләрне бетереп төгәлләделәр, асфальтның икенче катламын җәйделәр, барысын да тигезләделәр – автомагистральдәге кебек булды! Бүгенге көнгә кадәр без урамыбызның, бистә үзәгеннән йөзләрчә метр ераклыкта гына булуына карамастан, барысы тарафыннан да онытылган дип уйлаган идек. Юл төзелешендә катнашкан һәркемгә зур рәхмәт! Район җитәкчелегенә дә, бистә җитәкчелегенә дә, юл эшләре осталарына да!

Яңа асфальтны Садоваяга гына түгел, Демьян Бедный урамына да салдылар, ике урамны тоташтырдылар. Яңа асфальт капламы башланган урында ватылган булса да, юл бар иде әле, ә менә Садовая урамына асфальт беренче тапкыр түшәлде. Шуңа күрә дә халыкның шатлыгы нигезле.

Фәридә Фәизова, тырышлыгы барысын да уртак максатка алып барган мастер Александр Якушкинның, машинист-тигезләүче Альфред Мингалимовның, операторлар Владимир Дмитриевның һәм Данил Михайловның, катоклаучылар Юрий Овчинниковның һәм Дмитрий Явгаевның, төягеч машинисты Ринат Кәлимуллинның, мини-төягеч йөртүчесе Сергей Жарковның, юл эшчеләре Сергей Ильинның, Сергей Харитоновның, Ильмир Миңнехановның, Иван Ишанкинның, машина йөртүчеләр Рамил Садыйковның, Рәис Сабировның тырыш хезмәтләрен билгеләп үтеп, аларның эшләү процессын фотога төшергән.