Аксубай районында 2025 ел башыннан мошенниклык очракларының артуы теркәлгән

Агымдагы елның май аенда гына да хокукка каршы гамәлләрнең 2 яңа факты ачыкланган.

Районда яшәүче хатын-кыз, танышларының кисәтүләренә карамастан, үзләрен финанс оешмасы вәкилләре дип тәкъдим иткән билгесез затларга 900 мең сум акча күчергән. Агымдагы атна дәвамында бер гаиләнең аферистларга 400 мең сум акча күчерү очрагы теркәлгән. Башта ир-ат 131 мең сум акча күчерә, аннары мобиль җайланманы хатынына тапшыра, анысы иренең банк счетыннан 276 мең сум акча күчерә.

Хокук саклау органнары чаң кага. Дәүләт хезмәтләренә керү мөмкинлеген кулга төшереп, мошенниклар кешеләргә микрозаймнар һәм кредитлар рәсмиләштерәләр.

– Гражданнарга финанс операцияләрен башкарганда уяулык күрсәтергә киңәш ителә. Мошенниклык гамәлләре омтылышы булган очракларда, кичекмәстән ЭЭМның территориаль бүлегенә һәм шикле транзакцияләрне блокировкалау өчен банкның ярдәм итү хезмәтенә мөрәҗәгать итәргә кирәк, – дип искәртә Россия ЭЭМның Аксубай районы буенча тикшерү бүлеге җитәкчесе Эльза Большова.

Полиция хезмәткәрләреннән сезгә кырыкалдарлар кармагына эләкмәс өчен ярдәм иткән берничә киңәш:

1. Банк картасы реквизитларын, PIN-кодларны, шулай ук Дәүләт хезмәтләре порталы һәм башка хезмәтләрдән исәп язмаларыннан парольләрне хәбәр итү катгый тыела.

2. Билгесез затлар тарафыннан җибәрелә торган сылтамалар буенча күчәргә һәм аларның кушуы буенча программа тәэмин ителешен билгеләргә ярамый.

3. Үзләрен банклар, дәүләт яисә хокук саклау органнары хезмәткәрләре булып тәкъдим итүче затлардан телефон шалтыратуларына игътибар бирмәскә кирәк.

4. Актив банк операцияләре вакытында мобиль җайланмаларны өченче затларга тапшырырга киңәш ителми.

5. Шикле шалтырату булганда, сөйләшүне өзәргә һәм тиешле оешманың рәсми кайнар линиясе белән мөстәкыйль рәвештә элемтәгә керергә кирәк.