Өч айда 500дән артык юл хәрәкәте кагыйдәләрен бозу очрагы теркәлгән

Тагын 23 хокук бозуны полициянең участок вәкилләре теркәгән.

– Иң күп хокук бозулар – 227 очрак – иминлек каешын эләктермәү, икенче урында тукталыш кагыйдәләрен бозган, транспорт чарасын тротуарда яки җәяүлеләр кичүендә калдырган өчен – 58 очрак. Өченче урында – ОСАГО иминият полисы булмаган яки аңа кертелмәгән килеш руль артына утырган өчен – 37 очрак, – дип шәрехләде Аксубай районы ЮХИДИ бүлеге җитәкчесе Нияз Гыймалетдинов. – Юл хәрәкәте кагыйдәләрен бозуның кисәтелгән һәр очрагы, бәлки, җитди кагыйдә бозуларны булдырмый калгандыр. Чөнки юл-транспорт һәлакәте очрагында эләктерелмәгән каеш кеше үлеменә китерергә, тротуарда туктап тору юл-транспорт һәлакәте китереп чыгарырга мөмкин.

Юл хәрәкәте кагыйдәләренең башка пунктларын бозучылар да шактый. 21 машина йөртүчегә – укылмый торган номерлар өчен җәза бирелгән, юл билгесе таләпләрен бозган һәм штраф түләмәгән өчен – 15әр, каршы як полосага чыккан өчен –14әр, үзең белән тиешле документлар һәм идарә итү хокукы булмаган килеш һәм шулай ук исерек хәлдә транспорт чарасы белән идарә иткән өчен 10ар очрак теркәлгән.