Машина йөртү хокукыннан мәхрүм итү: таныклыкны тапшыру тәртибе һәм машина йөртүченең җаваплылыгы

Аксубай Дәүләт автоинспекциясе идарәсе җитәкчесе Нияз Гыймалетдинов хәбәр иткәнчә, хокуктан мәхрүм итү турында суд карары чыгарылган машина йөртүче суд карары законлы көченә кергәннән соң өч эш көне эчендә машина йөртү таныклыгын фактта яшәү урыны буенча Дәүләт автоинспекциясе бүлекчәсенә тапшырырга тиеш. Документ Дәүләт автоинспекциясендә махсус хокуктан мәхрүм итү срогы тәмамланганчы саклана.

Таныклыкны тапшырудан баш тарткан очракта, хокуктан мәхрүм итү срогы туктатыла һәм документны фактта тапшырганнан яисә аны югалту турында гариза биргәннән соң гына яңартыла.

Тиешле җәза турындагы карар көченә кергән көннән башлап, йөртүче махсус хокуктан мәхрүм ителгән дип санала. Әгәр бу очракта ул транспорт чарасы белән идарә итсә, шул исәптән тапшырылмаган таныклыгы булган очракта да, аны чираттагы җәза көтә: 30000 сум күләмендә административ штраф салу, яисә 15 тәүлеккә кадәр административ кулга алу, яисә 100-200 сәгатьлек мәҗбүри эшләр. Шул ук вакытта, ул идарә иткән транспорт чарасы тоткарлана һәм махсус тукталышка урнаштырыла.

Транспорт чарасы белән идарә итү хокукыннан мәхрүм итү срогы үткәч, машина йөртүчегә таныклык аның юл хәрәкәте кагыйдәләрен белүен тикшергәннән һәм юл хәрәкәте өлкәсендәге хокук бозулар өчен салынган административ штрафларны түләгәннән соң гына кире кайтарыла. Әгәр машина йөртүче исерек килеш машина руле артына утырган өчен, медицина тикшерүе узудан баш тарткан яисә юл-транспорт һәлакәтеннән соң алкоголь кулланган өчен хокуктан мәхрүм ителгән булса, таныклыкны кире алу өчен аңа транспорт чараларын йөртүгә каршылыклары булмавы турында медицина күрсәтмәсе дә кирәк булачак.

Дәүләт автоинспекциясе Юл хәрәкәте кагыйдәләрен төгәл үтәү кирәклеге турында искәртә һәм машина йөртүчеләрне руль артында үтә игътибарлы һәм сак булырга чакыра.