«Куркынычсызлык каешы»: Татарстан Дәүләт автоинспекциясе юл хәрәкәте кагыйдәләрен бозуга каршы акция үткәрә

Аның максаты транспорт чараларын йөртүчеләрнең һәм пассажирларның иминлек каешын эләктермәү белән бәйле административ хокук бозуларны кисәтү һәм булдырмау.

Россия Федерациясе Юл хәрәкәте кагыйдәләренең 2.1.2 пункты нигезендә механик транспорт чараларын йөртүчеләр куркынычсызлык каешларын кулланырга һәм иминлек каешын эләктерелмәгән пассажирларны йөртүгә юл куймаска тиеш.

Куркынычсызлык каешларыннан файдалану кагыйдәләрен бозу автоматлаштырылган фотовидеофиксация системаларында теркәлә, шуннан соң автомобиль хуҗалары административ җаваплылыкка тартыла.

Транспорт куркынычсызлыгы өлкәсендә махсуслаштырылган оешмаларның тикшеренү мәгълүматлары буенча, иминлек каешын куллану юл-транспорт һәлакәтендә үлем яисә җитди зыян күрү куркынычын машина йөртүчеләр һәм алгы утыргычтагы пассажирлар өчен 50% ка кадәр, арткы утыргычтагы пассажирлар өчен 25% ка кадәр киметергә мөмкинлек бирә. Автомобиль әйләнеп капланган очракта исән калу мөмкинлеге биш тапкырга арта.

Татарстан Республикасы Дәүләт автоинспекциясе юл йөрү кагыйдәләрен үтәргә һәм юл хәрәкәтендә катнашучыларга игътибарлырак һәм сак булырга киңәш итә.