Исерек йөртүчеләрне штрафлар да, хокуктан мәхрүм итү дә куркытмый.

2025 елның 12 февралендә Татарстан Республикасы Аксубай районының 2нче номерлы суд участогының җәмәгать судьясы РФ КоАПның 12.8 маддәсе 1 өлешендә каралган – транспорт чарасы белән исерек хәлдә идарә итү буенча административ хокук бозу турындагы эш буенча карар чыгарды.

Эш фигуранты – Н., 2025 елның 18 гыйнварында «Чистай-Аксубай-Нурлат» автомобиль юлында «Шевроле Круз» автомобиле руле артында тоткарлана. Тикшерү барышында дәүләт автоинспекторлары ачыклаганча, әлеге гражданин автомобиль руле артында исерек хәлдә булган, бу факт медицина тикшерүе нәтиҗәләре белән расланган. Ул сулап чыгарган һавада этил спирты концентрациясе 0,667 мг/л тәшкил иткән.

Суд Н.ны гаепле дип таныды һәм аңа 1 ел да 6 айга транспорт чаралары белән идарә итү хокукыннан мәхрүм итеп, 45 мең сум күләмендә административ штраф сыйфатында административ җәза билгеләде.

Юл хәрәкәте куркынычсызлыгы буенча комиссия рәисе Станислав Зайцев әлеге карарга аңлатма биреп, барлык юл хәрәкәтендә катнашучыларның, бигрәк тә транспорт чаралары белән идарә итүчеләрнең юл йөрү кагыйдәләрен үтәве мөһимлеген ассызыклады. Исерек хәлдә автомобиль белән идарә итү барлык юл хәрәкәтендә катнашучылар өчен дә җитди куркыныч тудыруын һәм аянычлы нәтиҗәләргә китерергә мөмкин булуын билгеләп үтте. Шулай ук ул мондый очракларның юл хәрәкәте кагыйдәләрен үтәүне контрольдә тотуны көчәйтү өчен сәбәп булып торуын да искә төшерде һәм машина йөртүчеләрне башка юл хәрәкәтендә катнашучыларга карата җаваплы һәм ихтирамлы булырга өндәде.

Суд карары законлы көченә керде һәм билгеләнгән срокларда башкарылачак.