Ләйләтүл-Кадер нәрсә ул?

Бу кичтә кылынган һәр изгелек өчен әҗер-саваплар күп тапкырга арттырыла ин шәә Аллаһ. Мең ай – бу 83 ел 4 ай дигән сүз.

Ләйләтүл-Кадер нәрсә ул?

Ләйләтүл-Кадер – Рамазан аендагы иң кадерле төн. Ул турыда Коръәндә (Әль-Кадер сүрәсендә) аерым сүрә белән әйтелә. Бу төннең мәгънәсе бик тирән:

-Коръән иңдерелгән төн – нәкъ менә бу кичтә Коръәннең иңүе башланган.

-Язмыш билгеләнү төне – бу төндә фәрештәләр кешеләрнең киләсе елга язмышларын язып куя.

-Кадер һәм көч төне – бу төндә кылынган гыйбадәт 1000 айдан да хәерлерәк.

Иң мөһим үзенчәлекләре

1. Вакыты

-Кайсы төнне эзләргә? Хәдисләрдә әйтелгәнчә, Ләйләтүл-Кадерне Рамазанның ахыргы 10 төненең так (ягъни 21, 23, 25, 27, 29) төннәрендә эзләргә кирәк.

2026 елның Рамазан аенда бу төннәр:

-21 нче төн – 10 марттан 11 мартка

-23 нче төн – 12 марттан 13 мартка

-25 нче төн – 14 марттан 15 мартка

-27 нче төн – 16 марттан 17 мартка

-29 нче төн – 18 марттан 19 мартка

-Билгеләре – галимнәр әйтүенчә, бу төн тыныч, салкынча, якты һәм күңелгә рәхәт була. Әмма аны төгәл билгеләү мөмкин түгел.

2. Бу төндә нәрсәләр була?

-Фәрештәләр иңә – Җәбраил (галәйһиссәләм) һәм күп фәрештәләр җиргә төшеп, мәгъфирәт (гафу итү) сорыйлар.

-Барлык кешеләрнең язмышы языла – Аллаһ Тәгалә бу төндә кешеләрнең язмышларын үзгәртә ала. Моның өчен ихлас тәүбә һәм изге догалар кылу кирәк.

3. Мөселманнар өчен әһәмияте

-Гыйбадәт кылу – тәравих, тәһәҗҗүд намазлары, Коръән уку, зикер, догалар кылу, аеруча Аллаһ тәгаләдән гафу сорау.

-Доганың көче – бу төндә хәтта гади генә гамәлләр дә 83 еллык гыйбадәт кылган кебек әҗер-савап китерә. Аллаһ Тәгалә безнең кылган һәрбер изге гамәлләребез кабул булсын. Әмин.

Аксубай районы имам-мөхтәсибе Равил хәзрәт Камалетдинов.