Язгы кыр эшләренә техника тулы әзерлектә чыгачак

Җир өстен ак кар каплады, алда озакка сузылган кыш айлары.

Игенчеләр булачак икмәк турында кайгырталар – кар эрү белән басу-кырларга чыгачак авыл хуҗалыгы машиналарын һәм агрегатларны әзерлиләр.

«Мюд» филиалының машина паркында җанлылык хөкем сөрә. Механизаторларның бер өлеше, җитәкчелекнең төрле йөкләмәләрен үтәп, эшләүләрен дәвам итәләр, калганнары – базада. Монда эш кайный. Ремонт остаханәсендә механизаторлар Александр Сорокин, Илназ Исламов һәм эретеп ябыштыручы Ринас Ханиев туфрак эшкәртү агрегатын әзерләү өстендә эшлиләр. Эшне күтәренке кәеф белән, көйле алып баралар. Агрегатларны төзекләндерүгә җаваплы карыйлар, чөнки язын алар белән үзләренә эшләргә туры киләчәк. Бригада ике асылмалы агрегатны җыйган инде, үзләре ышанычлы белдергәнчә – аларны бүгеннән үк кырга алып чыгарга була.

Техникаларны ремонтлау чорында тимерче цехында аерым активлык күзәтелә. Көзге агрочаралар тәмамлануга ук, биредә тырмаларны киләсе сезонга әзерләүгә керешкәннәр. Филиалда алар йөз данәдән артык.

– Бүгенге көндә тырмаларны ремонтлау төгәлләнү стадиясендә – осталар тырышты, – дип билгеләп үтте гараж мөдире Илсур Рәхимов. – Берничә данәне генә ремонтлыйсы калды.

Тимерче Владимир Молоткин эш кораллары белән җитез идарә итә. Аның әлеге һөнәрчелектәге хезмәт стажы егерме елдан артык. Алар белән бергә цехта механизаторлар Валерий Елистратов һәм Александр Кустенев эшли. Тырмаларны ремонтлау, беренче карашка авыр эш түгел кебек, әмма көч куюны таләп итә. Ремонтчылар һәр тырманы кул белән сүтеп җыялар, ватылган детальләрне алмаштыралар. Иртәдән кичкә кадәр алар машина-трактор паркында кайныйлар. Язгы кыр эшләре башлану белән һәркайсы үз бурычын үтәргә керешәчәк: чәчүдә хезмәт куячак, азык культураларын җыюда катнашачак, аларны азык йортларына ташыячак, комбайн штурвалы артында бөртеклеләрне урып-җыю эшләрен башкарачак. Менә шундый универсаль игенчеләр турында без район газетасы битләрендә бер генә тапкыр язмадык һәм район җитәкчелеге тарафыннан фидакарь хезмәт өчен бүләкләү чараларына да чыктык.

Гаражда автомобильләрне һәм тракторларны ремонтлау бара. КамАЗ шоферлары Владимир Наумов, Евгений Курдюков, Валерий Сухалов автомобильләрне тәртипкә китерәләр. Аларга слесарь Владимир Петров ярдәм итә.

– Безнең хезмәтчәннәр – теләсә нинди эштә ышанычлы, – дип бәяләде ремонтчылар хезмәтен филиал җитәкчесе Газыйм Шәрәпов. – Бүген алар техниканы ремонтлауда тырышып эшлиләр. Яз килү белән, трактор һәм машина руле артында үз урыннарын алачаклар. Бездә язга бар да әзер булачак. Сезон башыннан тугыз культиваторның – өчесе, 40тан артык тырма ремонтланган (план буенча 180гә якын). Хуҗалыкта техниканы кышкы саклауга куюны һәм авыл хуҗалыгы машиналарын ремонтлау барышын махсус комиссия тикшерде һәм бу эшне оештыруга яхшы бәя бирде.