Авыл киңлекләре: хезмәт, өмет һәм күңел өчен

 Бу кешеләр туган җирләрен яраталар һәм аның белән үзләренең өметләрен бәйлиләр. Алар, җиңел булмаган крестьян хезмәте белән шөгыльләнеп, җирдә эшлиләр. Бу алар өчен гаиләне тәэмин итү ысулы гына түгел, бу — бөтен авыл өчен терәк, традицияләрне саклау һәм җирле икътисадка ярдәм итү. Еш кына мондый авыл кешеләре — гади фермерлар гына түгел, ә шәхси ярдәмче хуҗалык тотучылар.

Районда Алексей Макаровны Яңа Аксубай авыл җирлеге башлыгы буларак кына түгел, ә актив волонтер буларак та беләләр. Ул зур шәхси ярдәмче хуҗалык тота. Хуҗалык алып бару бик күп көч һәм вакыт таләп итә. Ул ничек барасына да өлгерә дигән сорауга Алексей, авылның яшел болыннарында утлап йөрүче малларга, басу-кырларына күрсәтеп, җавап бирде.

– Барысы да яхшы. Бездә нинди киңлекләр! Боларның барысы да булганда, ничек эшләмисең инде?

Алексейга 41 яшь. Ул Киса авылында туып үскән, Яңа Аксубай мәктәбендә, аннары район үзәгендәге һөнәри лицейда укыган – механизацияне үзләштергән. 2002 елда армиягә чакырыла, ике елдан туган авылына әйләнеп кайта һәм авыл клубы мөдире булып эшли башлый, бу аңа кешеләр белән оештыру эшләрендә тәҗрибә китерә. Мәдәният өлкәсендә эшләү өчен белемне 2012 елда Алабуга мәдәният һәм сәнгать училищесында социаль-мәдәни эшчәнлек белгечлеге буенча ала.

Аннары эшчәнлек төрен кискен алыштыра – «ВАМИН Аксу»га Николай Прончатов җитәкчелегендәге куркынычсызлык хезмәтенә эшкә урнаша. Берничә елдан предприятие таркала, аны «Аксубай» агрофирмасына башта терлекчелек фермаларын механикалаштыру буенча инженер, аннары баш инженер итеп билгелиләр. 2020 елда җирле үзидарә советына сайлауларда Алексей Макаровны Яңа Аксубай авыл җирлеге депутаты итеп сайлыйлар. Авыл җирлеге башлыгына аның кандидатурасын ул вакытта муниципаль берәмлек җитәкчесе булып эшләүче Михаил Сулейманкин тәкъдим итә.

– Үз көчемне яңа эштә сынап карау кызыклы иде, – дип искә ала Алексей Валерьевич. – Михаил Максимович мине эш курсына кертте, ярдәм итте.

Макаровлар авылда хезмәт сөючәнлек белән билгеле, алар гомер-гомергә зур хуҗалык тотканнар. Җирле үзидарә җитәкчесе вазыйфасына билгеләнү Алексей Валерьевичка шәхси ярдәмче хуҗалыкны киңәйтергә ниятләгәндә каршылык тудырмый. Бик актив, эшлекле, булдыклы кеше буларак, ул бөтен җирдә – муниципаль хезмәттә дә, шәхси хуҗалыкта да эшләр белән идарә итәргә өлгерә. 2024 елда Алексей Макаров Татарстан Республикасы Авыл хуҗалыгы һәм азык-төлек министрлыгыннан шәхси ярдәмче хуҗалыкны үстерүгә грант ота. Катгый контроль аркасында муниципаль хезмәткәргә грант алу аеруча кыен була. Бөтен шартларны җиренә җиткереп үти. Грант акчасына ферма төзи, хуҗалыкта хәзер 36 баш мөгезле эре терлек бар, шул исәптән 10 савым сыеры, шулай ук тавыклар һәм дуңгызлар бар. Терлекләрне азык белән тәэмин итү өчен 40 гектар җир кишәрлеге исәпләнә. Бу мәйданда азык культуралары үстерә. Туфрак эшкәртү, печән әзерләү өчен техника сатып ала. Барлык эшләрне дә үзе башкара: сөрә, чәчә, печәнне җыя, киптерә. Киләчәктә бөртекле культуралар үстерү нияте белән яши. Әлегә маллар өчен фуражны сатып алалар. Сөтне көн саен сөт җыючыга тапшыралар.

Макаровлар гаиләсендә – өч бала. Өлкәннәре инде үскән, студентлар. Улы – Казан энергетика көллиятендә, кызы медицина көллиятендә укый. Кечкенәсенә – биш яшь, ул балалар бакчасына йөри. Хатыны Мария Васильевна Федоровка интернат-йортында эшли. Зур хуҗалыкта барысына да эш җитә. Тормыш иптәшенә дә, ялларга кайткан вакытта өлкән балаларга да.

Алексей Валерьевич – битараф кеше түгел, баш-аягы белән волонтерлык хәрәкәтенә чумган. Ул безнең махсус хәрби операциядә булган якташ-сугышчыларга гуманитар ярдәм китереп, Донбасска егерме тапкырдан артык барды. Ярдәм җыюда да, бу эшкә җирлек халкын җәлеп итеп, актив катнаша.

– Хәзерге вакытта СВОда җирлектән ундүрт кеше хезмәт итә, – ди ул. – Бәхетсезлеккә каршы, һәлак булучылар да бар, без алар турында онытмыйбыз. Бездә халык бик ярдәмчел. Алар махсус хәрби операциядә катнашучы сугышчылар өчен гуманитар ярдәм җыюда кулданкилгәнчә булышырга тырышалар, бер кемнең дә читтә калганы юк.