Аксубай районы Кече Акташ авылы матур табигать кочагында урнашкан

Владимир Чураковның «Минем кече ватаным – Савруш төбәге» китабында Кече Акташ поселогы турында кызыклы мәгълүматлар бар.

Ул бу мәгълүматларны республика архивы документларын өйрәнеп эзләп тапкан. Әлеге мәгълүматларны китерәбез:

«Поселокка 1928 елның 23 февралендә Атлашкино авылыннан Пимуллин Яков һәм Илюхин Илмурза инициативасы белән сөрелүче чуашлар тарафыннан нигез салынган, бу хакта 1928 елгы Чистай Кантзембүлеге документларында хәбәр ителә.

Поселокның беренче атамасы – Кече Акташкино.

1928 елның 22 августыннан, поселокның җир төзелеше вакытында Кече Акташ булып теркәлә.

Поселок составына 99 кеше белән 23 йорт хуҗалыгы кергән, шулардан: ир-атлар – 45, хатын-кызлар 54 кеше.

Атлашкино авылыннан яңа күчеп килүчеләр җиргә якынаерга һәм анда аны эшкәртүнең заманчарак ысулларын кулланып хуҗалык итәргә теләк белдерәләр.

Күчеп килүчеләр составы яшь ярлылардан һәм урта крестьян инвентаре белән җирле игенчеләрдән тора. Йорт хуҗалыкларында 12 ат, 17 сыер, 73 баш вак терлек, 9 сабан булган. Атлары булмаган ишегалларының саны – 11, бер ат белән 12 йорт булган.

Бүгенге Кече Акташ – урман белән әйләндереп алынган матур поселок. Урамнар арасында зур сулык урнашкан, бу исә авылның тышкы күренешен тагын да матуррак итә. Үзәк урам буйлап асфальт юл салынган.

Автор җир биләмәләре турындагы мәгълүматлар белән Кече Акташ поселогының йорт хуҗалыклары исемлеген китергән. Басма мәгълүматлары буенча халык саны: 1938 елда – 128 кеше, 1949 елда – 125 кеше, 1958 елда – 147 кеше, 1970 елда – 149 кеше, 1979 елда – 118 кеше, 1989 елда – 51 кеше, 2002 елда – 42 кеше, 2010 елда – 29 кеше, 2015 елда – 46 кеше, 2023 елда – 31 кеше (чуашлар).