Аксубай язучысы туып-үскән җиренә мәхәббәт белән китап язган

Басма битләре автор туып-үскән һәм бүгенге көндә дә шушында гомер иткән туган төбәккә игелекле хисләр белән сугарылган. Китапның тышлыгында – туган төбәк киңлекләре сурәтләнгән, китап битләрен актарып, авылның һәр кешесе үзе өчен туган авылын яңа яктан ача ала.

«Иске Үзи – минем кече ватаным» китабы – мәгариф ветеранының күпьеллык тикшеренү эшләре нәтиҗәсе.

Китап туган төбәк тарихыннан, Болгар чорыннан башлана. Автор мөһим вакыйгаларның барлык төп этапларын, сәбәп-нәтиҗә бәйләнешләрен җентекләп тасвирлый.

– Мин күп еллар дәвамында җыйган материалларга, авыл картларының истәлекләренә таяндым, – ди Аркадий Михайлов. – Шулай ук тарих белгече Борис Захаров җитәкчелегендәге Иске Үзи урта мәктәбенең туган якны өйрәнү музее материалларына да.

Автор балачактан ук барлык туганнарның да авылда яшәвен ишеткәнен таный. Бу чыннан да шулаймы? Әлеге сорауларга җаваплар табу өчен ул Иске Үзи халкының нәселен өйрәнү белән шөгыльләнә башлый.

Монда фамилияләр бик күп – язучы авыл кешеләре, аларның килеп чыгышы тарихы, казанышлары, бүгенге көндә үз нәселен данлап яшәгән кешеләр турында бай материал туплаган. Һәм басма өстендә җентекләп эшләп, яңа фактларны ачкан.

Үзи төбәгендә туып-үскән кешеләр өчен бу тарихи басма өстәл китабы була ала, чөнки аннан үзең өчен бик күп кызыклы мәгълүмат алып була.

Аркадий Михайлов китабына СССР Журналистлар берлеге, РФ Язучылар берлеге, Татарстан Республикасы Язучылар берлеге әгъзасы Евгений Турхан югары бәя биргән.