Анастасия Александровна Калукованың 90 яшьлек юбилее Алексеевка поселогы халкы өчен зур вакыйга булды

Җиде сыйныфны тәмамлагач, ул алга таба белем алу турында хыяллана, ләкин зур йорт хуҗалыгында эшче куллар кирәк була, һәм әтисе кызының өйдә калуын таләп итә. Шулай итеп аның озын хезмәт юлы башлана.

1955 елда Анастасия Иван Калуковка кияүгә чыга, алар бергәләп зур һәм нык гаилә коралар, алты бала үстерәләр.

Юбилярның бөтен хезмәт биографиясе «Дружба» колхозы белән бәйле. Төрле эшләрдә хезмәт куя, җәен чөгендер эшкәртә. Күпьеллык намуслы хезмәте өчен Анастасия Калукова «Хезмәт ветераны» исеменә, ә балалар тәрбияләгән өчен «Ана даны» медале белән бүләкләнә.

Анастасия Александровна Калукованың фидакарь хезмәте колхоз җитәкчелеге тарафыннан күп тапкыр билгеләп үтелә.

Анастасия Александровна вакыттан саргайган безнең 1980 елда чыккан «Ял пурнасе» газетасыннан өзекне саклаган, анда: ««Дружба» колхозы хезмәтчәннәре шикәр чөгендере үстерүдә зур уңышларга ирешә. Мәсәлән, Анастасия Калукова бер гектардан 392 центнер чөгендер алган. Бу эшне ул 20 елдан артык башкара», дигән юллар бар. Ул үзе һәм аның белән бергә фотога төшкән дус кызлары Зоя Галкина һәм Нина Макарова турындагы бу хәтерне бик кадерләп саклый.

– Без эшебезне җаваплы башкардык, туган колхозыбыз файдасына, аның күрсәткечләре яхшы булсын өчен тырыштык. Лаеклы ялга чыккач та ике ел эшләдем әле мин, өйдә утыра алмадым, гомер буе хезмәттә булгач, эшсез торуга җаным түзмәде, – ди Анастасия Александровна.

Юбилярның чын байлыгы – аның зур гаиләсе. 9 оныгы һәм 19 оныкчыгы аның йортында еш кунак.

Бу истәлекле көндә Анастасия Александровнага котлаулар белән Башкарма комитет җитәкчесе урынбасары Алексей Тимирясов һәм Беловка авыл җирлеге башлыгы Илсур Мәхмүтов килделәр. Алар аңа чәчәкләр һәм бүләкләр тапшырдылар, ныклы сәламәтлек һәм якыннары даирәсендә озын гомер теләделәр.