Районда ныклы һәм киләчәге булган фермерларның берсе – Алексей Кондратьев

Алексей Кондратьев – ачык кеше, хезмәттәшләре белән семинарларда, очрашуларда тәҗрибә уртаклаша, сорауларга җавап бирә. Кемдер өчен бу – эшлекле киңәшләр, авыл хуҗалыгы производствосында уңышларга ирешүдә ярдәм итү. Хуҗалык алып баруда кем остаз булды, дигән сорауга, ул болай дип җавап бирде:

– Мин Казан авыл хуҗалыгы институтында укыдым (галим-агроном). Шулай ук колхозда эшләдем. Бу – безнең эштә бик яхшы мәктәп.

Хуҗалыкның 1400 гектардан артык чәчүлек мәйданы бар. Фермер утыз гектардан башлаган. Монда хуҗалык ихтыяҗлары, халыкка, авыл хуҗалыгы предприятиеләренә сату өчен бөртекле, азык һәм техник культуралар игелә. Шул исәптән көзге культуралар да, шулай ук сабан бодае, арпа, солы, көнбагыш, гәрчич, вика, майлы торма да үстерелә. Культураларны игү һәм урып-җыю эшләре өчен ышанычлы техник паркы бар. Җитештерү базасына хәтта уңган хуҗа да сокланырлык. Монда катнаш азык әзерләү цехы эшли. Бу цех продукциясеннән авыл хуҗалыгы предприятиеләре дә, шәхси хуҗалыкларында маллар асраучы авыл халкы да файдалана.

Барысы да элеккеге «Заря» КХ базасында башланган, иске техниканы сатып алган һәм ремонтлаган. Күпмедер вакыттан соң ул бу мәйданчыкта склад биналары, ашлык киптерү, бөртек чистарту комплекслары, 60 тоннага автоүлчәгеч төзегән.

Фермер терлекчелек тармагын да уңышлы үстерә. Ит юнәлеше белән шөгыльләнә – мөгезле эре терлекләр һәм сарыклар асрый. 2020 елда 50 башка исәпләнгән мөгезле эре терлек фермасы төзегән. Хайваннар үзләрен кардада иркен хис итәләр. Үзе белдерүенчә, иске терлекчелек корпусын яңартырга һәм, билгеле инде, терлекләр санын арттырырга ниятли. Барысын да үз акчасына төзегән, сатып алган.

Үсемлекчелектә югары продукцияле орлыклар алу өчен орлыкчылык юнәлешен җәелдерергә планлаштыра. Бу проект – күпне вәгъдә итә торган, элиталы орлык һәрвакыт кирәк.

Нык фермерлык хуҗалыгы авыл өчен бик кулай. Сезонда ул Урмандеевода яшәүчеләрне эш белән тәэмин итә, биредә даими нигездә алты кеше хезмәт куя.

– Алексей Кондратьев – битараф булмаган кеше, авылның проблемалары аны һәрвакыт борчый, – дип билгеләп үтте Урмандеево авыл җирлеге башлыгы Валерий Николаев. – Техника һәм эшче кулларга ия булып, ул авыл җирлеге юлларын кардан чистарту, төзекләндерү мәсьәләләрендә ярдәм итә. Ул Сидул-Ерыклыда буалар төзегән, бәйрәмнәрнең иганәчесе булып тора.

Россельхозүзәкнең район бүлеге җитәкчесе Габдерәшит Гыйльметдинов һәм район авыл хуҗалыгы идарәсенең игенчелек буенча консультанты Фәндәс Гафиятуллин крестьян-фермер хуҗалыгында урып-җыю кампаниясенә әзерлек белән таныштылар. Фермер барлык объектларны да күрсәтте, үсемлекчелектәге эшләр турында сөйләде. Алар хуҗалыкның барлык басуларын йөреп чыктылар, белгечләр буларак, үсемлекчелеккә югары бәя бирделәр.