“Уникеле“ КамАЗ астына килеп кергән

Юл һәлакәте Аксубай районының Карасу авылыннан ерак түгел Аксубай-Нурлат автомобиль юлында килеп чыга.

30 апрель көнне төштән соң "уникеле" автомобиле КамАЗ машинасы астына килеп керә, тикшерү мәгълүматларыннан билгеле булганча, җиңел машина йөртүчесе машинага идарәне югалта, юл кырыен "эләктерә" һәм автомобиль әйләнеп капланып каршы хәрәкәт итү юлына борылып куя.

Аксубай районының ЮХИДИ бүлеге мәгълүматлары буенча, һәлакәттә җиңел машина йөртүчесе зыян күргән - ул баштан Чистайга, аннары республика шифаханәсенә озатыла. КамАЗ йөртүчесе соңгы вакытка кадәр аварияне булдырмаска тырыша, әмма бәрелешү барыбыр килеп чыга.

Бәхетле очрак ярдәмендә генә каршы килүче тагын бер җиңел машина зыян күрми калган - әлеге машинаның видеорегистраторы бәрелешү мизгелен төшереп ала.