Аксубайлы Мәскәүдә хәрби парадта катнашачак

Бу – аның тормышында икенче Җиңү Парады. Россия МЧСның гражданнар саклау Академиясе курсантлары төркеме составында ул узган елның 9 май парадында катнашты. Алексей Иванов – 3 нче Аксубай урта мәктәбен тәмамлаган. Спорт белән шөгыльләнүе, яхшы укуы аңа Мәскәү өлкәсенең Химки шәһәрендәге югары Академиягә юл ачкан да инде. Биредә дә Алексей иң яхшы курсантлар арасында.

Әти-әнисе – Алексей Юрьевич һәм Маргарита Михайловна улларының намуслы хезмәте өчен часть командирыннан Рәхмәт хаты алдылар. Илнең төп мәйданы буйлап меңләгән хәрби хезмәткәр парад сафы белән узганда, әти-әни алар арасыннан улларын күрү өмете белән дулкынланып карашларын экранга төбәячәк. Алар Алексей белән горурланалар, аның барысы да әйбәт килеп чыгуына шатланалар.

«Алексейның безнең белән сөйләшергә вакыты да юк, – диләр алар. – Бу көннәрдә курсантлар сафта йөрергә ныклап әзерләнәләр. Парадта барысы да төгәл булырга тиеш бит".

Фото: Ивановлар гаилә альбомыннан