Иске Ильдеряк урта мәктәбенең математика һәм информатика укытучысы Надежда Шустова «Безнең яңа укытучы» республика конкурсы җиңүчеләре арасына керде һәм грантка лаек булды.
Конкурс берничә этаптан торды: гаризалар кабул итү, һөнәри тест үтү һәм индивидуаль проектны яклау. Быел республиканың 500 яшь педагогы грант иясе булды.
Надежданың педагогик стажы — өч ел. Бу кыска вакыт эчендә яшь белгеч үзен көчле профессионал итеп күрсәтә алды.
Республика бүләге педагогның үз эшен чын күңелдән яратуын һәм укучыларны белем дөньясына ышанычлы алып баруын раслый. Математика һәм информатика бүген һәркемгә кирәк. Бу фәннәр логик фикерләргә, уйланырга, заманча технологияләрдән файдаланырга һәм авыр биремнәрдән курыкмаска өйрәтә. Алынган грант укытучыга гадәти булмаган дәресләр үткәрергә, яңа материаллар кулланырга һәм дәресләрне тагын да кызыклырак итәргә ярдәм итәчәк.
Нет комментариев