Карасу җирлегендә үсеш стратегиясе турында фикер алыштылар

Очрашу конструктив төстә узды: район җитәкчелеге һәм җирлек халкы ел башыннан башкарылган гамәли эш нәтиҗәләре турында фикер алыштылар һәм алдагы адымнарны билгеләделәр.

Район башлыгы Алмаз Мингулов җирлек җитәкчесе Рәсим Фәхретдинов җитәкчелегендәге җирле үзидарә эшчәнлегенә уңай бәя бирде, хуҗалык бурычларын системалы хәл итүгә басым ясады.

Хисап чорында җирлектә гамәли чаралар комплексы гамәлгә ашырылган:

• Кече Сөлчә елгасы аша салынган күпер ремонтланган, бу транспорт элемтәсен өзлексез тәэмин иткән;
• суүткәргеч төзекләндерелгән һәм гидротехник корылма (ГТС) ремонтланган;
• халык көче белән үләннәрне чабу, карт агачларны кисү һәм баганаларны агарту буенча киң күләмле эшләр башкарылган;
• «Чиста су» акциясе үткәрелгән;
• үзара салым акчаларына коймалар, баганалар, цемент һәм вак таш сатып алганнар, конструкцияләрне халык белән бергә урнаштырганнар;
• Әмирҗан мәчетенең манарасын алыштырганнар;
• Аграрийлар ихтыяҗы өчен электр көтүчесе урнаштырылган.

Традицияләрне саклап, авыл халкы Сабан туен үткәргән, хатын-кызларны 8 март белән котлаганнар һәм 94 яшьлек тыл хезмәтчәненә игътибар күрсәткәннәр. Спорт батырлыгын һәм һәлак булганнарның истәлеген хөрмәтләп, СВОда вафат булган авылдашлар хөрмәтенә 2нче ачык волейбол турниры оештырганнар. Шулай ук Карасу авылы урта мәктәбендә махсус хәрби операциядә һәлак булган, әлеге мәктәптә белем һәм тәрбия алган элеккеге укучылар Сергей Ванчурин һәм Фәнил Фәхретдинов истәлегенә истәлек такталары куелган.

Заманча йортлар фонында ташландык иске тораклар авылның күренешен бозып тора. Төзекләндерү максатында авылдагы ике ташландык йортны сүтеп, мәйданны чистартканнар, мөселман зираты территориясен чабып чыкканнар.

Халык белән әңгәмә җирлектә яшәүчеләрнең агымдагы ихтыяҗларын ачыкларга мөмкинлек бирде. Район җитәкчесе көнүзәк сорауларга җавап бирде, карасулыларның инициативаларына киләчәктә дә ярдәм итәргә әзер булуын раслады, шул ук вакытта авыл тормышында активрак катнашырга, шәхси ярдәмче хуҗалыкларны киңәйтергә, республика грантларында катнашып үсәргә өндәде.