Волков урамында өй туе: нефтьчеләр өчен өч йорт

«Татех» АҖ нефть оешмалары хезмәткәрләре өчен планлаштырылган ун йортның өчесен торгызды. Подрядчы оешма – «Татспецстрой» АҖ. Бер йортның бәясе 11 миллион 400 мең сум тәшкил иткән. Төзелеш – 2025 елның мартында башланган, төгәлләү – 2027 елның декабрендә.

Волков урамында яңа торак йортларны кулланышка тапшыруны билгеләп үтү өчен, бу өйләрдә яшәячәк гаиләләр, торак зонасын булдыруда турыдан-туры катнашлары булган компанияләр һәм район җитәкчеләре җыелды.

– Яңа ел алды көннәрендә мондый чараларны үткәрү аеруча күңелле, – дип билгеләп үтте район башлыгы Алмаз Мингулов. – Өч яңа йорт һәм киләчәктә тагын җиде! Моның өчен «Татех» җитәкчелегенә аерым рәхмәт белдерәсе килә. Торак төзү – ул республиканың һәм районның нефть тармагына, яшь гаиләләргә зур ярдәм.

Район җитәкчесе урамның күптән түгел генә формалаша башлавын билгеләп үтте. Юл салганнар, яктырткычлар куелган, энергетиклар тырышып эшләгәннәр, газ, су, субүлгеч сузганнар. Төзелеш компанияләре өйләрне вакытында торгызганнар.

Яңа өйгә күчүчеләргә ТР сәнәгать һәм сәүдә министры урынбасары Дмитрий Гуськов мөрәҗәгать итте.

– Министрлыктан һәм шәхсән үз исемемнән яңа фатирга күчүчеләрне, компания җитәкчелеген һәм район хакимиятен яңа үсеш чоры белән котлыйм! Республика деурбанизациягә таба бара: Казан – перспективалы үзәк, әмма районнар да үсәргә һәм уңайлы һәм лаеклы яшәргә тиеш. Бу гомуми планның кечкенә бер өлеше, ләкин юнәлеш дөрес.

«Татех» АҖ генераль директоры Фәрит Гыймранов май аенда ук биредә ялан кыр һәм пычрак булганлыгын искә төшерде. Ул нефть компаниясе хезмәткәрләре өчен йортлар төзүгә өлеш кертүчеләрнең барысына да, баш подрядчыга – срокларны үтәгәннәре һәм энергетикларга – оперативлыклары өчен рәхмәт белдерде.

– Компания 2000 елдан бирле Аксубай җирендә эшли, – дип ассызыклады ул. – Бу безнең районны үстерүгә керткән иң зур өлешебез түгел. Бу йортларда бәхетле тормыш булсын.

Ведомство җитәкчеләре алкышлар астында биредә яшәүчеләргә шәхси бүләкләр тапшырды. Символик момент: район башлыгы йорт хуҗалары Рәдиф Хәмәтшинга, Валерий Ижутовка, Андрей Золинга ачкычлар тапшырды.

Йортларда яшәүчеләр исеменнән төзүчеләргә, нефть компаниясе вәкилләренә рәхмәт сүзләре белән Гүзәл Хәмәтшина мөрәҗәгать итте.

– Безнең өчен бу квадрат метрлар гына түгел, ә балаларыбыз үсәчәк, гаилә традицияләре урнашачак урын, – диде ул. – Йортлар төзүгә катнашы булган һәркемгә чын күңелдән рәхмәт белдерәбез.

Кызыл тасма киселде, биредә яшәүчеләр беренче кунакларны өйгә чакырдылар.