Озату тантаналы төстә Хәрби Дан мемориалының яңартылган мәйданында узды.
Аксубайдан Максим Горбунов, Тимур Дәүләтшин, Динар Кәбиров, Максим Сафронов, Ильфат Хәмидуллин, шулай ук Татар Сөнчәлесеннән Илнар Мирҗанов, Медянкадан Евгений Попов һәм Яңа Чуваш Адәмсуы авылыннан Александр Тиманов хезмәткә киттеләр.
Егетләрнең һәркайсы катгый сайлау узган, аларның сәламәтлеге нык, физик әзерлеге яхшы, алар авырлыкларга психологик яктан әзер һәм хәрби сафка тулы ышаныч белән басалар.
Сәгать уклары иртәнге сәгать бишне күрсәткәндә, мәйданда буш урын юк иде. Егетләрне армиягә озатырга әти-әниләре, туганнары һәм якыннары җыелды.
Тантаналы озату
Тантаналы митингны район башлыгы Алмаз Мингулов ачты. Хәрби хезмәткә чакырылучыларга мөрәҗәгать итеп, ул бу көннең аеруча әһәмиятле булуын ассызыклады.
– Ватанны саклау – мактаулы һәм җаваплы бурыч, – дип билгеләп үтте район җитәкчесе. – Армиядә хезмәт итү – ул ир-егет өчен чын сынау, батырлык һәм холык мәктәбе. Әти-әниегез сезнең белән горурлансын, ә яшьләр өлкән буынның лаеклы варисы буларак сезгә тиңләшсен өчен, аны намус белән һәм лаеклы узыгыз.
Район җитәкчесе Алмаз Мингулов егетләрнең армиядә хезмәт итеп кайтканнан соң, анда алган күнекмәләрне туган Аксубай районының чәчәк атуы өчен куллануларына өметен белдерде.
Чирмешән һәм Аксубай районнары хәрби комиссары майор Алмаз Шәйдуллин булачак солдатларга изге теләкләр белән мөрәҗәгать итте.
– Россия армиясе – дөньяда иң яхшысы. Әти-әниләрегезгә сезгә дөрес тәрбия биргәннәре өчен рәхмәт хатлары килеп торсын өчен, анда намус белән хезмәт итегез, – диде ул.
Үзәк хәрби округ инспекторы генерал-майор Анатолий Молоствов, шулай ук «Ватанга хезмәт итәм» район иҗтимагый ветераннар оешмасының чик сакчылары берлеге җитәкчесе Алексей Бобов булачак Ватан сакчыларына аталарча теләкләрен җиткерделәр. Алар солдатларга түземлек, антларына тугрылык һәм бер елдан соң өйләренә шатлык белән кайтуларын теләделәр.
Күркәм гадәт
Күркәм гадәт буенча һәрбер хәрби хезмәткә чакырылучыга заманча кәрәзле телефоннар тапшырылды. Гаджетлар белән бергә егетләр өлкәннәрдән өйдәгеләр белән элемтәдә торырга кирәк, дигән төп практик гозер дә алдылар. Даими шалтыратулар һәм хәбәрләр – ул улларын хезмәттән сагынып һәм горурланып көтеп алучы әти-әниләр өчен иң зур бүләк.
Нет комментариев