Аксубай ветераны 45 ел гомерен җирдә эшләүгә багышлаган

Район җитәкчелеге исеменнән ветеранны юбилее белән котларга Башкарма комитет җитәкчесе урынбасары Илдар Ислямов килде.

– Хөрмәтле Минсәр Гайнатулла улы! Сез бик авыр заманнарда яшәгәнсез, күп сынаулар узгансыз, район иминлеге хакына фидакарь хезмәт куйгансыз. Хезмәтегез өчен чын күңелдән рәхмәт сүзләрен кабул итегез. Сезгә чын күңелдән сәламәтлек, бәхет, алдагы көннәрдә дә якыннарыгызның җан җылысын тоеп яшәвегезне телим.

Илдар Ислямов ветеранга район башлыгының Рәхмәт хатын һәм истәлекле бүләк тапшырды.

Яңа Кармәт авыл җирлеге башлыгы Илнур Шакиров та авылдашын җылы котлады.

Бу көнне ветеран иң якын кешеләреннән – балалары, оныклары, туганнарыннан күп санлы котлаулар кабул итте, алар өчен ул һәрвакыт төп остаз булып кала.

Балачак

Аның Бөек Ватан сугышы кагылган балачагы бик иртә тәмамлана. Авыл мәктәбенең җиде сыйныфын тәмамлагач, ул, тагын дүрт сеңлесе үскән гаиләдә бердәнбер малай буларак, әти-әнисенә ярдәм итү өчен укуын ташларга мәҗбүр була. Каты чор олыларча адымнар ясауны таләп итә: Минсәр Гайнатулла улы үсмер чагыннан ук хезмәт юлына баса.

– Әти безгә яшьтәшләре белән үгез җигеп, Лаешка ашлык ташулары турында сөйли иде, – дип юбилярның тормыш юлы тарихы белән таныштырды кызы Әлфинур Шагаева. – Яшьтән үк авыр хезмәт аның холкын чыныктырган.

Гаилә һәм хезмәт

1959 елда ул гаилә корган. Тормыш иптәше белән мәхәббәттә һәм татулыкта 62 ел гомер кичергәннәр, кызлар үстергәннәр, аларга белем биргәннәр.

Авыл кешесенең хезмәт юлъязмасы туган җире белән тыгыз бәйләнгән. Үз тормышының 45 елын ул механизатор, шофер эшенә багышлаган. Хәтта лаеклы ялга чыккач та авыл хуҗалыгында эшләвен дәвам иткән.

Өч ел элек Минсәр Гайнатулла улының тормыш иптәше вафат булган. Ветеран якыннарының кайгыртуы белән уратып алынган: олы кызы белән бергә алар хуҗалык алып баралар. Вакыйгаларга бай тормыш аңа нәсел дәвамчылары булган яшь буынның үсүен күрү шатлыгы бүләк иткән — бәхетле бабакайның алты оныгы һәм бер оныкчыгы бар.

Минсәр Гайнатулла улы – сугышның кырыс сынауларын һәм сугыштан соңгы авыр хезмәтне кичереп, нык гаилә корып, үзендә гаять көчле рух, игелек һәм тормышка мәхәббәт саклап калган буын үрнәге.