Кичке Аксубай Җиңү көнен бәйрәм итте

Мәйданда район халкы һәм кунаклар җыелды.

Гаиләләре белән килүчеләр дә бар иде. Сәхнәдән җырлар яңгырады, тамашачылар артистларга кушылып җырладылар, биеделәр. Балалар рәхәтләнеп уйнадылар, батутларда сикерделәр. Концерт программасы караңгы төшкәч тә дәвам итте, фонарьлар кабынды.

Җыелучыларга район башлыгы Камил Гилманов мөрәҗәгать итте.

– 78 ел безгә тыныч күк йөзе тәэмин иткән өчен ата-бабаларыбызга рәхмәт, – диде ул. – Бүген дә Украинада неонацизмга каршы көрәш бара, яклаучылар арасында якташларыбыз да күп. Аларның тиз арада Җиңү яулап, өйләренә кайтуларын чын күңелдән телибез.

Бәйрәм сәхнәсендә район мәдәният йорты игълан иткән «Мой цветущий май» видеороликлар акциясендә җиңүчеләрне бүләкләү булды.

Җиңүче булып Түбән Баланда авыл мәдәният йорты танылды. Икенче урын Иске Ильдеряк һәм Беловка авыл җирлекләренә бирелде, Мюд һәм Яңа Ибрай авыл җирлекләре өченче призер булдылар. Район җитәкчесе тантанада катнашучыларның көчле алкышлары астында призерларга грамоталар һәм бүләкләр тапшырды.

Кичә программасы Бөек Җиңүнең 78 еллыгы хөрмәтенә бәйрәм салюты белән тәмамланды.