Авыл мөгаллимәсе кырык ел рус телен укыткан

Туган Иске Кыязлы мәктәбендә кырык ел вакыт аның өчен бер мизгел кебек үтеп киткән.

– Минем төп бурычым рус телен ирекле һәм грамоталы үзләштерүгә өйрәтү иде, – ди Мәүлия Сруртдин кызы. – Ә бу грамматика белеменнән башка мөмкин түгел. Чөнки җәмгыятьтә тел белеменнән башка үзара тулы кыйммәтле хезмәттәшлек мөмкин түгел. Югары мәктәпләрдә уку елларында белем бирү эшчәнлеге һәм һөнәр үзләштерү, карьера баскычыннан алга таба хәрәкәт итү сөйләм байлыгына бәйле. Әмма милли мәктәптә рус телен укытуның үз үзенчәлекләре бар. Рус грамматикасын уңышлы үзләштерү өчен, укучы үз туган телен яхшы белергә тиеш. Шуңа күрә дәресләрдә татар телен параллель рәвештә кулланырга туры килде. Ә әдәбият дәресләрен туган әдәбият белән охшаш үткәрергә.

Мәүлия Сруртдин кызы мәктәпнең 110 еллыгына багышланган бәйрәмдә кичә дәвамында элеккеге укучылары даирәсендә булды.

– Укытучыбыз ярдәмендә без институтларга һәм техникумнарга уңышлы кердек, анда беренче имтихан рус теленнән инша яисә диктант булды һәм без яраткан һөнәрләребезгә ия булдык, – диделәр алар, педагогны җылы кочаклап. – Рус телен белгәнгә, шәһәрдә туып үскән курсташлар белән мөнәсәбәтләрдә без үзебезне ышанычлы хис итә алдык. Ә бу бик мөһим иде!

Чыннан да, укытучы – иң затлы гына түгел, иң рәхмәтле һөнәр дә.

Бүген Мәүлия Сруртдин кызының беренче чыгарылыш укучыларына – алтмыш яшьләр тирәсе инде. Һәм бу мәктәптә бүген дә ветеран-укытучыларның иң кадерле кунаклар булуы бик сөенечле. Мәгариф учреждениесе белән Мәүлия Хөснуллинаның кызы Фирдәвес Зәйдуллина җитәкчелек итә. Фирдәвес Минәхтәм кызы, укытучы һөнәренең никадәр авыр һәм җаваплы икәнен белеп, шушы юлны сайлаган.

Мәүлия Сруртдин кызы бүген кызы һәм бертуган энесе – тарих укытучысы Искәндәр Могыйновның аның эшен дәвам итүләре белән чын-чынлап горурлана.