Әнкәйләр хөрмәтенә

Зал халык белән тулы иде - балалары һәм оныклары чыгышын карарга бөтен район үзәге кешесе килгән. Бию, җыр һәм уен кораллары бүлекләренә йөрүче балалар сәхнәдә бер-берсен алыштырып, матур чыгыш ясадылар. Дүрт-алты яшьлек иртә-эстетик төркем балалары да әниләрен шатландырдылар. Һәр чыгыш яраткан әниләргә багышланды. Башкарма комитет җитәкчесе урынбасары Сергей Александров район башлыгы исеменнән әниләрне кайнар котлады. - Әниләр безне гомер буена озатып киләләр - безнең уңышларыбызга куаналар, игелекле эшләргә этәрәләр. Бөтен наз-сөюләрен безгә бирәләр. Барлык әниләр алдында да баш иям, - дип белдерде ул. Программа соңында иҗат мәктәбенә йөрүчеләр һәм аларның укытучылары сәхнәгә чыгып, әниләр турында дулкынландыргыч җыр башкардылар. Кечкенәләре исә тамаша залына төшеп, әниләренә шарлар бүләк иттеләр.