Төбәк операторы Аксубайда чүп-чар белән тулган контейнер мәйданчыклары проблемасына аңлатма бирде

Апрельдә Аксубай районы территориясеннән, үткән ай белән чагыштырганда, 3 мең кубометрга күбрәк чүп-чар чыгарылган.
Каты көнкүреш калдыклары белән эш итү буенча «Гринта» ҖЧҖ төбәк операторының матбугат хезмәте хәбәр иткәнчә, үсеш 48 % тәшкил иткән. Фаразланган мәгълүматлар буенча, май аенда каты көнкүреш калдыклары күләме апрель ае дәрәҗәсендә булачак.
– Кешеләрнең каты көнкүреш калдыкларына карамаган чүп-чар – төзелеш калдыкларын, агач ботакларын, үлән, автомобиль тәгәрмәчләрен чыгара башлавы аркасында Аксубай районы авыл җирлекләрендә хәл катлаулана. Аларны чыгару коммуналь хезмәтләр бәясенә кертелмәгән. Мондый калдыклар, күләмле булганлыктан, теләсә кайсы контейнерны һәм теләсә кайсы чүп ташу машинасын тиз тутыра. Нәтиҗәдә, коммуналь калдыклар өчен урын калмый, – дип аңлатма бирде төбәк операторының операцион директоры Александр Оленин. – Каты көнкүреш калдыкларын күбрәк кул белән төяргә кирәк булганлыктан, кайбер торак пунктларга хезмәт күрсәтү вакыты артты.
Йөкләнеш соңгы айда берничә махсус техниканың ватылуына китерде. Хәзерге вакытта барлык чүп ташу машиналары да тәртипкә китерелгән. «Гринта» линиягә өстәмә машиналар, шул исәптән рөхсәтсез чүплекләрне чистарту өчен манипуляторлы йөк машиналары чыгара.
Район халкына вәзгыятьне үзләренә дә аңлап карарга кирәк. Үсемлек калдыкларын ашлама алу өчен компостка кертү яхшырак. Агачларның эрерәк ботакларын утынга җибәрергә мөмкин. Әгәр бу ике вариант та канәгатьләндерми икән, чыгару өчен махсус техника ялларга мөмкин.