Начар күрүчеләр өчен тротуар

Район үзәгенең Октябрь урамында тротуар буйлап сукыр кешеләр өчен тактиль плитә салганнар.

Әлеге урамда ул "Үтәрлек мохит" программасын тормышка ашыру кысаларында барлыкка килгән. Районның баш архитекторы Илдар Ислямов сүзләренә караганда, әлеге плитә начар күргән кешеләр өчен юлда имин йөрү күрсәткече ролен уйный. Әмма ни өчен бу плитәне нәкъ менә хәзер һәм шул урамга салганнар? Чөнки тактиль тротуар плитәсен җәяүлеләр өчен аеруча куркыныч булган урыннарга салалар. Ә район үзәгенең Октябрь урамында хәрәкәт аеруча интенсив.