Ел башыннан Аксубай мәшгульлек үзәге 48 кешене эшкә урнаштырган

32 ел элек нәкъ менә шушы көнне «Россия Федерациясендә халыкны эш белән тәэмин итү турында» закон кабул ителә.
Иван Маклаков җитәкчелегендәге район мәшгульлек хезмәтендә дүрт әйдәп баручы инспектор эшли. Алар эшчәнлекнең төрле юнәлешләрен үз эченә ала. Наталья Никонова – эш бирүчеләр, Юлия Барсукова – эшсезләр һәм эш эзләүче район халкы белән хезмәттәшлек итә, Венера Стоянова гражданнарны һөнәри укыту белән шөгыльләнә, Елена Данилова – махсус программалар алып бара: җәмәгать эшләренә урнаштыру, балигъ булмаганнарны, авыр тормыш хәлендә булган кешеләрне эшкә урнаштыру. Аларның һәрберсе үз белгечлегендә югары класслы профессионал.
Бу Аксубай районы мәшгульлек үзәгенең республика рейтингында иң яхшы позицияләрдә булуын да раслый. 50дән артык оешма арасында ул 15 нче урында тора. 1 гыйнвардан районның мәшгульлек үзәгенә 81 эшсез граждан ярдәм сорап мөрәҗәгать иткән. 48 кеше эшкә урнаштырылган. Мәшгульлек хезмәте өзлексез үсеш ала, аны үзгәртеп кору, эшкә урнашу проблемаларын хәл итү өчен нәтиҗәле юллар эзләү бара.
– Без халык белән эшләүнең төрле формаларын кулланабыз, – дип сөйли Наталья Никонова. – Даими рәвештә вакансияләр ярминкәләре оештырабыз: бу мәйданчыкта эш бирүчеләр һәм эш эзләүчеләр очраша һәм бу очрашу күбесенчә эшкә урнашу белән тәмамлана; ерак торак пунктларга бара торган мобиль офис эшли, белгечләр халык белән очраша; ихтыяҗ булган белгечлекләр, мәсәлән, сак хезмәткәре һөнәрен алырга теләүче гражданнар өчен укытулар оештырабыз. Йөзләгән кеше тулы күләмдә эшләргә һәм лаеклы яшәргә мөмкинлек ала.
Мәшгульлек үзәге белгечләре бер максатка – кешеләр турында кайгырту, авыр тормыш хәлендә аларга ярдәм итү максатына хезмәт итә.
Фото: Аксубай мәшгульлек үзәге архивыннан.