Синхрончылар ярышын карадылар

Федоровка интернат-йортта социаль хезмәтләр алучылар Алексей Жилов һәм Александр Панинга Казан шәһәрендә үткән су спорты төрләре буенча 16 нчы дөнья Чемпионаты ярышларының бер төрен карау мөмкинлеге тәкъдим ителде.

Бу бәхет Хезмәт, мәшгульлек һәм социаль яклау министрлыгы ярдәме белән елмайды.

- Бик күңелле булды, безне волонтерлар елмаеп, хәерле көн теләп каршы алдылар, - дип сөйләде коляскада гына хәрәкәтләнгән инвалидларны озата барган Лилия Лукина. - Залда парлы синхрон йөзү спортын яратучылар җыелган иде, алар һәр катнашучыны көчле алкышлар белән каршы алдылар. Әлбәттә инде, без дә Россия спортчылары чыгышын кул чабып куәтләдек. Без әлеге сәфәрдән бик канәгать калдык, онытылмаслык тәэсирләр алдык.