Вакытыннан алда пенсиягә чыгарга хокуклы педагоглар исемлеген киңәйтергә тәкъдим ителде

Татарстан Дәүләт Советы Россия Хөкүмәте рәисе Михаил Мишустинга шундый мөрәҗәгать әзерләде.

Парламентарийлар картлык буенча хезмәт пенсиясен вакытыннан алда билгеләү хокукы бирә торган вазифалар һәм учреждениеләр исемлегенә үзгәрешләр кертүне сорый. Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты утырышында депутат Людмила Рыбакова шул турыда сөйләде.

«Россиядә иминият пенсияләре турындагы законда каралганча, [тиешле] вазифалар исемлегенә кертелгән һәм 25 ел стажы булган педагогик хезмәткәрләр вакытыннан алда пенсиягә чыгу хокукына ия. Әмма бу исемлеккә кертелмәгән һөнәрләр бар», – дип аңлатты ул.

Аерым алганда, мондый проблема балалар бакчаларында туган тел һәм чит телләрне укытучы тәрбиячеләргә кагыла. Расланган вазифалар исемлегендә «Тәрбияче» исеме генә билгеләнгән, әмма «Рус телен укыту буенча тәрбияче», «Туган телне укыту буенча тәрбияче» һәм «Чит телләрне укыту буенча тәрбияче» вазифалары юк.

«Мәрхәмәт – Милосердие» депутатлары оештырган кайнар линия барышында Мамадыш районы кешеләре мөрәҗәгать итте. Алар бу мәсьәләне күтәрде. Шуңа күрә без Россия Хөкүмәтенә әлеге һөнәрләрнең бердәйлеген билгеләү турындагы тәкъдим белән чыгабыз», –  дип билгеләп үтте Рыбакова.

Моннан тыш, мәктәп директорының тәрбия һәм балалар өчен җәмәгать берләшмәләре белән хезмәттәшлек буенча киңәшчесенең дә вакытыннан алда пенсиягә чыгу хокукы юк, дип өстәде парламентарий. Яңа вазифа педагогик хезмәткәрләргә кагыла һәм 2022 елдан Россиянең 45 төбәгендә кертелгән.

«Бу белгечлек хезмәт урыннары номенклатурасына кертелгән, ләкин вазифалар исемлегенә кертелмәгән. Татарстанда 1411 гомуми белем бирү оешмасы һәм 98 һөнәри белем бирү учреждениесе эшли. Аларда 2023-2024 уку елында бу вазифада 1509 педагог эшләячәк», – дип белдерде депутат.

Аның сүзләренчә, педагогик стаж җыйган кешеләрнең киңәшче итеп билгеләнүе ихтимал. Алар педагогик хезмәткәрләр арасыннан сайланырга мөмкин. «Әлеге вазифага күчкәч, алар пенсиягә вакытыннан алда чыгу хокукыннан мәхрүм калачак», – дип аңлатты Рыбакова.

Шулай итеп, Татарстан Дәүләт Советы Россия Хөкүмәтенә мәктәп директорының тәрбия һәм балалар иҗтимагый берләшмәләре белән хезмәттәшлек буенча киңәшчесен вазифалар исемлегенә кертү тәкъдиме белән мөрәҗәгать итә. Моннан тыш, депутатлар «Рус телен укыту буенча тәрбияче», «Туган телне укыту буенча тәрбияче» һәм «Чит телләрне укыту буенча тәрбияче» һөнәрләренең «Тәрбияче» вазифасы белән бердәйлеген билгеләү мәсьәләсен хәл итүне сорый. Мөрәҗәгать парламентның алдагы утырышында каралачак.

Чыганак