Тарих укытучысы укучыларны үткәннәр мисалында тәрбияли

Укучыларга мәктәп программасы кысаларында билгеле бер белем суммасын бирү – укытучының бердәнбер бурычы түгел. Яхшылыкны явызлыктан, хакыйкатьне ялганнан аера белүче шәхес тәрбияләү дә шулай ук мөһим. Бу яктан, тарих, әдәбият кебек үк, чиксез мөмкинлекләр ача. Әхлакый сыйфатлар туган төбәкнең героик үткәне, халкы, аерым кешеләр, авыл кешеләреннән мисаллар тәрбияләргә ярдәм итә. Каһарманлык, ата-бабалар тормышы – шәхес формалаштыруның мөһим чарасы, дип саный Таһир Зиннәт улы. Ул үзе дә Әфганстанда армия хезмәте үткән һәм, әлбәттә инде, балалар өчен батырлык үрнәге булып тора.

– Таһир Зиннәт улы – бар яктан да иҗади шәхес, – дип сөйли мәктәп директоры Тәслимә Идиатуллина. – Барысына да җаваплы якын килә. Аны, завуч буларак, мәктәптә уку процессының торышы гына түгел, сыйныфларда һәм кабинетларда, уен һәм спорт мәйданчыкларында уңайлыклар тудыруга юнәлтелгән бар нәрсә дә борчый. Минем хезмәттәшем безнең укучыларның уку өчен шартлары һәм мөмкинлекләре шәһәрдәге яшьтәшләренекеннән ким булмасын өчен барысын да эшли.