Сәламәтлек саклау министрлыгында гриппка каршы прививка ясатуның әһәмиятен аңлаттылар

Грипп эпидемиясе сезоны башланыр алдыннан Россия Сәламәтлек саклау министрлыгы вакцинациянең әһәмияте хакында кисәтте – бу грипп йоктыру куркынычын киметергә ярдәм итәчәк. Бу хакта «Российская газета» сәламәтлек саклау министры ярдәмчесе Алексей Кузнецовка сылтама белән хәбәр итә.

«Шуны искәртәсем килә: 60 яшьтән өлкәнрәкләр, хроник йогышлы авырулардан интегүче кешеләр, көмәнле хатын-кызлар, шулай ук 6 яшькә кадәрге балалар гриппны бик авыр кичерә. Әлеге төркемгә караган гражданнар гриппка каршы беренче чиратта прививка ясатырга тиеш», - диде Кузнецов.

Ул шулай ук профилактик прививкалар календарена көллият һәм югары уку йортлары студентлары, армиягә чакырылучылар һәм социаль әһәмияткә ия өлкәдә эшләүчеләрнең кайбер категорияләре керүен искәртте.

«Яңа төрдәге COVID-19 коронавирус инфекциясе таралган чорда грипп йоктыру куркынычы беренче чиратта янаган гражданнарны үз вакытында вакцинацияләү аеруча әһәмияткә ия», - дип искәртте сәламәтлек саклау министры ярдәмчесе.

Чыганак: tatar-inform.tatar