Россиянең яңа төбәкләре турында бүлек кертелгән география дәреслеге тәкъдим ителәчәк

Бу хакта Россия мәгариф министры Сергей Кравцов «ТАСС»ка Петербург халыкара икътисади форумы кысаларында биргән интервьюсында хәбәр итте.

Кырымда «Настоящая российская журналистика для новых регионов» дигән яңа дәреслек тәкъдим ителде. 1 сентябрьдән Луганск халык республикасы мәктәпләрендә яңа белем бирү стандартлары этаплап кертеләчәк.

«Без географиядән яңа дәреслек әзерлибез, анда карталарда да, география дәреслегенең үзендә дә яңа төбәкләр күрсәтеләчәк. Дәреслек төзү процессы озак эш. Без булган тәҗрибәгә таянабыз. Якынча, киләсе уку елында без географиядән яңа дәреслек тәкъдим итәчәкбез», – диде агентлык әңгәмәдәше.

Министр географиянең бердәм федераль укыту программасы кысаларында эшләячәк алты фән исемлегенә керүен искәртте. Программа киләсе уку елыннан укытыла башлый.

Россия Президенты Владимир Путин 2022 елның 4 октябрендә Донецк һәм Луганск халык республикаларын, Запорожье һәм Херсон өлкәләрен ил составына кабул итү турында законнар имзалады. Сентябрь ахырында анда Россия составына керү мәсьәләсе буенча референдумнар узды, аның өчен халыкның күпчелеге тавыш бирде.

Чыганак