Республиканың иң яхшы комбайнчылары арасында

Бөртеклеләрне җыеп алу чорында ТР Авыл хуҗалыгы һәм азык-төлек министрлыгы атна саен  ашлык суктыру һәм сугып алу буенча мониторинг үткәрде. Республика комбайнчылары арасындагы ярыш күрсәткечләренә нигезләнеп фикер йөрткәндә,  “Аксу Агро“ агрофирмасы механизаторы Җәүдәт Сафиуллин иң алдынгы игенчеләрнең берсе.

20 сентябрьгә бирелгән мәгълүматлар буенча ул  комбайннарның икенче төркемендә (барлыгы дүрт төркем) дүртенче күрсәткечне алып тора. Җәүдәт Сафиуллин Нью-Холланд комбайнында 2710 тонна ашлык суктырып алган. Ул – игенчеләр нәселеннән.

– Кечкенәдән урак өстендә әтигә булышып үстем, – дип искә алып сөйли Җәүдәт Сәлихҗан улы. – Элеккеге комбайннарның барлык маркалары белән дә эшләдек. Шартлар бүгенге кебек түгел иде, шулай да тырышып хезмәт куйдык.

Авырлыкларга карамастан, механизатор нәтиҗәләргә ирешүгә омтылу сыйфатын бүгенге көнгә кадәр саклап килгән. Күңеленә хуш килгән һөнәрне сайлаган. Иске Ибрай урта мәктәбен тәмамлаганнан соң  Аксубай  һөнәри училищесына (ул вакыттагы) укырга керә.

Тракторчы-машинист дипломын алып туган хуҗалыгына эшкә килә. Игенчелек тармагы белгече буларак, чәчү эшләре чорында – трактор, урак өстендә комбайн артына утыра. Игенчелек хезмәтендә утыз елдан артык хезмәт куя ул.

– Безнең хуҗалыкта өлге итеп куярлык механизаторлар аз түгел, – дип сөйли “Аксу Агро“ АФ генераль директоры урынбасары Фәнис Минеголов. – Җәүдәт Сафиуллин – шундыйларның берсе.

Язгы чәчүдән башлап ул барлык кыр эшләрендә дә катнаша, сезонны көз азагында, туфракны язгы чәчүгә әзерләп тәмамлый. Мондый хезмәт мактауга лаек.

Узган елда Татарстанның алдынгы ике йөз комбайнчысы арасында ул республика премиясенә лаек булды. Урак өстендә ул улын үзенең ярдәмчесе итеп алды. Җәвид яшь булса да, игенчелектә тәҗрибә тупларга өлгергән. Гаилә экипажы ирешкән уңышларда аның да өлеше бар.