Район китапханәләре яшьләрне укуга җәлеп итү буенча зур эшләр башкара

Сентябрь аенда мондый мөмкинлек өч тапкыр тәкъдим ителде.

8 сентябрьдә Дагыстанның халык шагыйре, йөздән артык китап авторы Рәсүл Гамзатовның тууына 100 ел тулды. Юбилейлы истәлекле дата уңаеннан биредә “Поэзия души” әдәби сәгате үткәрелде. Очрашуда катнашучыларны язучының иҗаты белән таныштырдылар, шигырьләре яңгырады.

“Расул Гамзатов – народный поэт Дагестана” дигән мәгълүмати күргәзмә әзерләнгән иде.

2023 елның 9 сентябрендә бөек рус язучысы һәм философы Лев Николаевич Толстойның тууына 195 ел тулды, аның әдәби мирасы булып йөздән артык сәнгать әсәре исәпләнә.

Язучының юбилеена шулай ук китап күргәзмәсе дә тәкъдим ителде. Шунысы игътибарга лаек, укучыларны Толстой публицистикасы белән таныштырдылар, чөнки аның белән бик аз кеше таныш. Яшь китап укучылар белән “Косточка”, “Пожарные собаки” хикәяләрен, “Три медведя” әкиятен искә төшерделәр. Алар турында фикер алышканда, балалар мөстәкыйль рәвештә төп геройларның сыйфатларын ачыкладылар, шул ук вакытта аларның гамәлләрен бәяләделәр. Нәтиҗәдә, яшь китап укучылар Толстойның китаплары яхшылыкка, кыюлыкка, гаделлеккә һәм тапкырлыкка өйрәтә дигән нәтиҗә ясадылар.

Танылган татар язучысы һәм шагыйре Абдулла Алишның тууына 115 ел тулу уңаеннан китапханәдә “Мастер сказок – Алиш” дип исемләнгән китап күргәзмәсе дә оештырылды. Якташыбыз шигырьләр, очерклар, хикәяләр һәм пьесалар язган, әмма ул татар әдәбияты хәзинәсенә кергән әкиятләре белән аеруча билгеле. Аның әсәрләре балаларда иң гүзәл сыйфатларны тәрбияләргә ярдәм итә. Һәм авыл китапханәчеләре бу мөмкинлектән тулысынча файдалана.

Фото: Яңа Тимошкино китапханәсе архивыннан.