Район Чуаш милли-мәдәни үзәге елга йомгак ясады

Утырыш көн тәртибенең төп мәсьәләсе мәктәпкәчә белем бирү учреждениеләрендә туган телне куллану булды.

Милли-мәдәни үзәк советы рәисе Роза Чентаева балаларны рус телендә тәрбияләүче ата-аналарның тискәре ролен ассызыклады.

– Туган телгә мәхәббәт балачактан бирелә, һәм бу сер түгел, – дип билгеләп үтте ул. – Бүгенге көндә балалар бакчаларында, мәктәпләрдәге кебек үк, балалар өчен туган тел белән кызыксыну уяту планында барлык шартлар да бар. Мәгариф бүлеге милли телләргә тиешле игътибар бирә. Ел саен мәктәпләрдә чуаш фольклоры фестивальләре үткәрелә, апрель аенда Туган тел көннәре зур бәйрәм кебек уза. Мәдәният бүлеге шулай ук барлык чараларны да безнең белән берлектә үткәрә.

Халкыбызның гореф-гадәтләрен һәм йолаларын саклап калу юлларының берсе – ул Уяв район бәйрәме, ул бездә һәрвакыт якты вакыйга буларак уза һәм туган мәдәниятебезне үстерүне аннан башка күз алдына да китереп булмый.

Мәдәният бүлеге мөдире Алексей Тимирясов билгеләп үткәнчә, ел дәвамында мәдәният учакларында халык иҗаты фестивальләре этаплап уза һәм алар район бәйрәме буларак тәмамлана. Әмма бәйрәмнәр һәм фольклор фестивальләр генә тел үсешенә ярдәм итми.

Совет утырышында билгеләп үтелгәнчә, монда якташ язучылар белән очрашулар һәм авыл китапханәләрендә китапханәчеләр зур җаваплылык белән әзерли торган әдәби кичәләр зур роль уйный.

Булачак эш планында муниципаль район Башкарма комитеты җитәкчесе Алмаз Мингулов туган як, район торак пунктлары тарихын тирәнрәк өйрәнүне тәкъдим итте, бу да туган телгә кызыксыну уята.

Утырышта шулай ук күрше төбәкләрнең милли-мәдәни үзәкләре белән хезмәттәшлекне киңәйтү, шулай ук Чуашстан язучылар берлеге белән тагын да тыгызрак элемтә урнаштыру тәкъдим ителде.

Башкарма комитет җитәкчесе Алмаз Мингулов Чуаш милли-мәдәни үзәге советы әгъзаларын якынлашып килүче Яңа ел белән котлап, һәркайсына һөнәри эшчәнлектә дә, җәмәгать эшендә дә уңышлар, сәламәтлек һәм иминлек теләде.