Мобилизацияләнмәгән булса да, ул махсус хәрби операция зонасына ирекле рәвештә киткән булыр иде

Һәр Аксубай кешесенең йөрәгендә авыр югалту әчесе.

Хәрби дан мемориалы янында батыр сугышчы белән хушлашу матәменә йөзләгән кеше килде. Шул исәптән дуслары, туганнары “Ватанга хезмәт итәм” ветераннар хәрәкәте вәкилләре, кыска вакытлы ялга кайткан махсус хәрби операция зонасында катнашучылар, таныш һәм таныш булмаган кешеләр.
Хәрби оркестр Россия һәм Татарстан гимннарын башкарды. Кайгы матәмен район башлыгы Камил Гилманов ачты.

–Ватанга куркыныч янагач, Михаил читтә калмады, – диде ул. – Башка якташларыбыз белән бергә, кулына корал алып, аны яклауга басты. Михаил белән таныш булган кешеләрнең барысы да аның турында бары тик яхшы сүзләр генә әйтәләр. Ул һәрвакыт ярдәмгә килергә әзер торган якты күңелле, ышанычлы дус булган. Ул безнең өчен каһарманлык үрнәге булып калачак. Булачак патриотлар буыны аңа тигезләнәчәк һәм батырлык гамәлләренә сокланачак.

Район җитәкчесе Таировлар гаиләсенең авыр кайгысын уртаклашты.

Михаил Таиров үлгәннән соң Батырлык ордены белән бүләкләнгән. Район җитәкчесе орденны сугышчының әнисе Любовь Ивановнага тапшырды.

Кайгы матәмендә катнашучыларга ТР спорт министры урынбасары Илдар Садриев мөрәҗәгать итте.

–Илебез һәм әти-әнисе үзләренең батыр улын, гаиләсе – тормыш иптәшен, улы – әтисен, туганнары якын кешеләрен югалтты. Татарстан Республикасы Хөкүмәте исеменнән сугышчының гаиләсенең, әти-әнисенең авыр кайгысын уртаклашам, Ватанның лаеклы улын тәрбияләп үстергән өчен, рәхмәт сүзләрен җиткерәм. Алар безнең илне басып алырга теләгән дошманга каршы көрәшәләр. Аларның сугышчан хезмәтләре нәтиҗәсендә безнең баш өстендә тыныч күк йөзе. Аның батырлыгы һәрвакыт безнең йөрәкләрдә булачак. Михаилга мәңгелек дан.

“Ватанга хезмәт итәм” ветераннар хәрәкәтенең Аксубай районы “Диңгезчеләр кардәшлеге” җитәкчесе Анатолий Скворцов ветераннар, волонтерлар исеменнән Михаилның гаиләсенә кайгы уртаклашу сүзләрен җиткерде.

– Бу – район өчен дә, барыбыз өчен дә зур югалту, – диде ул. – Шундый ир бала үстергәнегез өчен сезнең алда түбәнчелек белән баш иям. Без аның турында һәрвакыт истә тотачакбыз.

Митингта катнашучылар Михаил портреты янына канәфер чәчәкләре салдылар – аның белән саубуллашырга килүчеләрнең озын чираты тезелде. Геройны Аксубай православие зиратында җирләделәр.

Михаил бернәрсәгә дә битараф булмаган, көчсезләрне яклаган, чит бәла-казаны үзенеке кебек кабул иткән, ярдәмчел һәм тирә-юньдәгеләргә хөрмәт белән карый торган кеше булган. Үз гаиләсе өчен – ул яраткан, кайгыртучан ул, абый, тормыш иптәше, әти.

Михаил 1993 елның 27 августында туган. 2023 елның 9 августында сугышчан биремне үтәгәндә һәлак була.

Узган елның 22 октябрендә район халкы зур төркем мобилизацияләнгән һәм ирекле кешеләрне махсус хәрби операция зонасына озатты, бик авыр, киеренке шартлар булды, ир-атлар кая баруларын аңладылар, озатып калучы якыннарына җиңелрәк булсын өчен, хәтта шаярттылар да. Ул вакытта район газетасы хәбәрчеләре Михаил янына килеп, берничә сорау биргәннәр иде. Әдәпле ир-егет, күңеленә ничек кенә авыр булмасын:

–Мин чакыру кәгазе килгәнне көтеп арыдым инде. Бирмәсәләр – ирекле булып китәм, дип уйлаган идем. Менә мин монда, барысы да яхшы, – дип сөйләгән иде.

Михаил 3 нче Аксубай урта мәктәбенең 9 сыйныфын тәмамлый, 2009-2012 елларда киң профильле тракторчы-машинист белгечлеге буенча Аксубай универсаль технологияләр техникумында укый. Россия армиясендә ашыгыч хезмәтне стратегик билгеләнештәге ракета гаскәрләрендә уза. Демобилизацияләнгәннән соң Казанда эшли, өйләнә, улын тәрбияли.

Махсус хәрби операция зонасында ул героик сугыш юлы уза. Танкка каршы идарә ителә торган ракетаның өлкән операторы була, ефрейтор исемендә хезмәт итә.

Күптән түгел генә кыска вакытлы ялга кайткан, якташлары хәтерендә якты истәлекләр калдырган. Аның белән очрашуга барлык танышлары да сөенгәннәр, һәрберсе аңа Җиңү белән исән-имин кайтуын теләгән.

Ул Аксубай волонтерлары янында да булды – хатын-кызлар сугышчы белән очрашуга чын күңелдән шатландылар, сөйләшеп туя алмадылар. Саубуллашканда аңа, дошманнан саклану өчен, маскировка челтәре тапшырдылар. Ни аяныч, бу соңгы очрашу булды.