Мәктәп яны лагеренда ял көннәре – яңа ачышлар кебек

Экологик бәйрәмдә балалар океаннар турында видеофильм карадылар, анда яшәүче хайваннар дөньясы белән таныштылар. Мәктәп алдындагы асфальтта алар үзләренең океанариумнарын сурәтләделәр, экологлар ролендә булдылар, су объектларында белергә һәм истә тотарга кирәк булган куркынычсызлык кагыйдәләре белән таныштылар.

Икенче көнне иртән ял итүчеләрнең дус командасы Аксубайга экскурсия ясады.

Балалар агачка уеп сыннар ясау остасы Андрей Бикмуллинда кунакта булдылар. Монда да аларны чын ачыш көтте. Оста кулында гади агач кисәге әкият персонажларының искиткеч төсмерләрен ала. Андрей агач эше буенча осталык дәресе үткәрде һәм балаларга да бу сәнгатьтә үзләрен сынап карарга тәкъдим итте. Болар барысы да “Татех” ЯАҖ идарәчесе Юрий Ильин ярдәмендә мөмкин булды, ул мәктәпкә уңайлы транспорт бүлеп бирде.

Мәктәп яны лагеренда шулай ук традицион сабан бәйрәменең бөтен атрибутикасы белән күңелле Сабан туе узды. Балалар үзләренең “Пиратлар мәҗлесе”н үткәрделәр, рәхәтләнеп көлделәр, күңел ачтылар.

“Мәктәп укучысының мәдәни көндәлеге” проектында катнашучы балалар шулай ук Россия көненә багышланган “Минем Россиям – минем илем” Бөтенроссия акциясенә кушылдылар. Кыскасы, һәр көн яңа ачышлар белән тулы. Балалар шулай ук коррупциянең нәрсә икәнен һәм аңа каршы торырга ничек өйрәнергә икәнен белделәр.

– Ачышлар әле күп булыр дип ышанам, – ди мәктәп директоры Наталия Воронина. – Смена әле дә дәвам итә бит!

Фото: Кәкре Күл мәктәбе архивыннан.