Күзгә күренми торган дошман: сезнең өегездәге күгәрек сәламәтлеккә ничек тәэсир итә ала

ТР Роспотребнадзор идарәсенең территориаль бүлеге өлкән белгече Гүзәл Исмәгыйлева укучыларыбызга гөмбә авыруларыннан сәламәтлеккә зыян китермәскә дигән тәкъдимнәр белән мөрәҗәгать итте.

– Ванна бүлмәсенең яисә кухняның почмакларындагы кара тапларны һәрберебез бер тапкыр булса да күрде. Ләкин моның артында реаль куркыныч яшерелгәнен бик азлар гына аңлый. «Күгәрек» сүзе астында галимнәр микроскопик гөмбәләрнең 1000 нән артык төрен исәпләп чыгаралар. Алар төсе, формасы һәм «өстенлекләре» белән аерылалар: тукыма, кәгазь, агач, пыяла һәм хәтта пластикада да үсәләр. Кызганычка каршы, заманча торак төрле төзелеш материаллары һәм җилләтү үзенчәлекләре аркасында бу гөмбәләр өчен идеаль «инкубатор» була ала.

Өйдә нәрсә сулыйбыз?

Ябык биналарда ешрак Penicillium һәм Aspergillus төрләренең күгәрек гөмбәләре очрый. Алар һәрвакыт диярлек фатир һавасында була. Төп куркыныч – гөмбәләр бик күп микъдарда җитештерә торган споралар (конидияләр). Споралар һавага бик җиңел күтәреләләр, бүлмәләр буйлап күчеп йөриләр һәм, туклыклы мохиткә эләгеп, арталар. Яңа колония нибары бер атна эчендә үсәргә мөмкин.

Даими «күрше» нәрсәсе белән куркыныч?

Күгәрек табибларны җитди борчый. Ул китереп чыгара торган авыруларның спектры киң:

• Турыдан-туры гөмбә инфекциясе (тире, сулыш юллары зарарлануы).

• Аллергик реакцияләр (томаудан бронхиаль астмага кадәр).

• «Авыру биналар синдромы». Бу начар вентиляцияле, гидроизоляция бозылган һәм күгәрек белән зарарланган биналарда озак вакыт яшәүче кешеләрдә барлыкка килә торган авырулар төркеме. Билгеләре каты аллергиягә охшаш: баш авырту, күңел болгану, баш әйләнү, тире кызару. Үзенчәлекле билге: бу симптомнар сез урамга чыгу белән тиз юкка чыга.

Үз йортыңны ничек якларга: Роспотребнадзордан 10 гади адым

Күгәрек барлыкка килмәсен өчен катлаулы булмаган кагыйдәләрне үтәү дә җитә:

1. Даими рәвештә ванна бүлмәсен, кухняны, кладовойларны һәм мебель артындагы почмакларны карап чыгыгыз.

2. Бүлмәләрне ешрак җилләтегез һәм кондиционер системасына хезмәт күрсәтегез.

3. Тузанны суыртыгыз — бу өслектән спораларны бетерә.

4. Шкафларны һәм тартмаларны җилләтегез, бигрәк тә сез сирәк ачканнарын.

5. Резина келәмнәрне, кер юу машинасының тыгызлагычларын, душ бүлмәсендәге һәм санузелдагы киштәләрне яхшылап чистартыгыз.

6. Ванна бүлмәләреннән тыгыз келәмнәрне алып куегыз – аларны тулысынча киптереп булмый диярлек.

7. Душтан соң пәрдәләрне җәеп куегыз һәм тулысынча корыганчы шулай калдырыгыз. Юыну мунчаласын яхшылап сыгыгыз.

8. Су җыелып торуга һәм агып торуына юл куймагыз. Әгәр су агып чыкса — тиз арада суны җыеп алыгыз һәм җилләтүне көчәйтегез.

9. Бүлмә үсемлекләрен сугаруны күзәтегез — туфракның артык дымлануы гөмбә үсүенә ярдәм итә.

10. Гөмбә белән зарарланган һәм инде эшкәртелүгә бирешми торган әйберләрне, йомшак җиһазларны һәм келәмнәрне кызганмыйча ташлагыз.

Температура режимы, оптималь дымлылык һәм чисталык — менә күгәрексез йорт өчен өч төп нигез. Онытмагыз: коры һава һәм тәртип — гөмбәгә каршы иң яхшы профилактика.

Исегезгә төшерәбез, торак биналарның микроклиматына (температура һәм дымлылык) таләпләр СанПиН 2.1.3684-21 һәм СанПиН 1.2.3685-21 документларында ныгытылган. Бу нормаларны үтәү сезнең сәламәтлегегезне саклаячак.

Йортыгызга игътибарлы булыгыз — һәм ул сезгә зыян китермәс!