Кош гриппы куркынычыннан ничек сакланырга?

Куркыныч авырудан ничек саклану турында район ветеринария берләшмәсе җитәкчесе Рәис Хөснуллин сөйли.

– Кош гриппы – кошларның кискен йогышлы вируслы авыруы, ул ашкайнату, сулыш алу органнарын зарарлый, югары таралуычанлыгы белән аерылып тора.

Инфекцияне таратучылар булып – кыргый һәм синантроп кошлар тора. Бу вәзгыятьтә бүген гражданнардан, шәхси ярдәмче хуҗалыклар тотучылардан, кошчылык хуҗалыклары җитәкчеләреннән аеруча уяулык таләп ителә.

Саклану чараларын тайпылышсыз үтәү мөһим. Аерым алганда: кош-кортны тәрбияләү, тоту, сату санитария-гигиена, ветеринария- санитария кагыйдәләре һәм нормалары нигезендә башкарылырга тиеш; йорт кошларын кыргый кошлар белән контактны булдырмас өчен ишегалдында асрарга кирәк.

Кошларның күпләп үлүе ачыкланганда, участок ветеринарларына мөрәҗәгать итәргә яисә район ветеринария берләшмәсенә шалтыратырга кирәк.